Shillong: U MLA ka Nongkrem Constituency uwa man leh u Chairman ka Meghalaya State Planning Board, u Lambor Malngiang da kyntu u ya u Montri Rangbah ka jylla, u Conrad K Sangma wow booh noh da ka Skill Training University neibynta wow wailaad ya ki khynroo khyllood ka jylla, khamtam hadien wa palat 20 hajar ngut da wan uiñ cha ka jylla na ki kaam na kiwi ki jylla neidaw ka khlam COVID-19.
Da ong u wa hanlada ka jylla em ko hapyrdi i chitom poisa, tangwa hap thooh ya ki laad neibhah kiwa wan uiñ biang cha jylla ymye de ki wow pteiñ yei kreh, wei hadien wa wanpoi ki ye u ku ki kaam pyrchah aiñ neidaw wym yoh kreh ki kamtæ lada em ka University ye bha ko wow yarap ya ki.
Da ong u wa ka jylla da em chwa ko ki bru wa dooh khih dooh kreh wei i wan uiñ kiwa na baar dang pynku chooh i ya i boon kiwa dooh kreh, wei deiwa wanrah ya ka Skill Training University ka wow kynthup ya waroh ki jait kreh nadooh kiwa khian hadooh kiwa heh, wei kamjooh wow chna ya ki laad neibynta ki khynroo khyllood wow yoh ya ki ram na ki Bank hadien wa dadep ya ka esikai.
Da ong u leh wa neiliang ka MSPB daw khut yalang ko wa ki chnat sorkar hajrong kani ka bynta ha ka 7 tarik uni u bnai wow phyllu yumut kammon wow leh hajrong kani ka bynta.
