Em 26 ngut kiwa lai khawai ha Shillong

Shillong: U Director of Health Services (DHS) yong ka jylla, u Dr. Aman War da pyntip u wa em 52 ngut kiwa em ya u khñiang COVID-19 ha ka jylla, wei ynne ka sngi da em 4 ngut kiwa yoh thymme, katwa 2 ngut kiwa na South West Garo Hills da pynbna wa da chait noh ki ynne ka sngi.

Katkam wa pyntip u DHS, hadooh i por 5:30 i janmiet kiwa dang em ya u COVID-19 man ki 33 ngut ha East Khasi Hills wa kynthup 26 ngut ki BSF, 5 ngut ki bru paidbah, 2 ngut ki chipai Air Force; ha Ri-Bhoi em ki 15 ngut, East Jaiñtia Hills 1 wa ha West Garo Hills 3 ngut.

Da pyntip u wa ki chipai BSF wa da dep wow Test da em 1006 ngut da ki Rapid Test ha Composite Hospital, Umpling wa 735 ngut wa da Test da ka RT-PCR wei da chem 26 ngut da yoh ki ya u COVID-19, katwa kiwa dang yang yaka Report em ki 108 ngut. Da pyntip chooh chooh u leh wa wa ya ka Rapid Test da leh ya 262 ngut ha Dobasipara, 70 ngut ha Paharinagar wa 52 ngut ha Dhankagre wei kini waroh ym em chah ktah ki.

U Dr. Aman War da pyntip u leh wa na ki 2 ngut kiwa yoh COVID-19 na i lai khawai chong kurim ha Khanapara, ka chnat i chait i khiah da chem wa 44 ngut kiwa yajan næ ki High Risk Contact, deiwa pyntip leh wa uwa sah ha Pynthorbah, em 23 ngut ki High Risk, katwa kiwa yajan wa uwa na Lower Lachumiere da em ki 21 ngut ki High Risk, wei ka chnat dang booddien chooh chooh wow chem ya kiwi leh kiwa yachem wa kiwa yajan wa kini ki bru.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Da pyntip u leh wa ka chnat da yoh yutip ko wa em 26 ngut kiwa lai khawai ha Shillong, tangwa neiliang ki tre yung da pyntip ki wa em du 15 ngut, tangwa ya ini, ka chnat dang thooh bniah ko wow chem sakhiat, deiwa pynrap leh wa ka chnat da dep ko wow yaklam wa ki 41 ngut, kiwa da pynsñiaw wa smat ki wow ya krehlang wa ka sorkar.

Ha i jooh i por u DHS da ong u wa ki 52 ngut kiwa yoh ya u COVID-19 toh kiwa lait na i chitom næ kiwa man Asymptomatic, da ong u wa kini ym slem waroh daw chait noh ki, deiwa pynrap leh wa ka jylla man ko kawa da pynkhreh heiwa yatoh wa ki sumaar lada em kiwa chitom na kiwa yoh ya u COVID-19.

Ha i jooh i por u Dr. War da kyntu u ya ki paidbah wow man ki kiwa syndong yow lait na i chah ktah ha u COVID-19, deiwa ong wa i yada toh i pynchait na kani ka khlam.