15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1

Da pyndep ya ka Behdieñkhlam 2020 hajrong i sur wow beh ya ka khlam COVID-19

Advertisement ad1
Advertisement ad1

Jowai: Ynne ka sngi Muchai, ka lehniam Behdieñkhlam ka Raij Jowai da poi ko chawa kut hajrong i sur wow beh wei wow yada na ka khlam u COVID-19.

Ynne ka sngi da pyndep ya i Ngooh Blai wei Choh Thyndai ha ki yung ki sem kiwa em ha Kmairaij (Dorbar Chnong).

Ha Aitnar deiwa bood ya ki kyndon ka Special Operating Procedure (SOP) kiwa kitkaam niam da hiar ki deiwa jngai iwi na iwi wow e ngooh e dem ya u Trekirot wa ki Blai ki Syiem wow e yei kyrkhu kyrdoh, wei wow da ya ka chnong ka thaw wa ka Raij na ka khlam u COVID-19.

Hadien ini neiliang kiwa da jied da ki chnong da hiar ki ha Aitnar jar jiar ka pali wow pyndep ya i ngooh i dem.

Ya ka Behdieñkhlam ha Aitnar da wan sakhi da u Chief Justice ka Meghalaya High Court, u Ranjit Vasantrao More wa u MLA ka Jowai, u Wailadmiki Shylla.

Ha i janmiet nawon da pyndep ya ka Datlawakor wei ha uni u snem ym em iwon iwon i yaleh hapyrdi ki ar pynthor (ka Pynthor Wah wa Pynthor Neiñ) heiwa neiliang u Dolloi ka Elaka, u Puramon Kynjing da pynbna u wa ha uni u snem u kba ha pyn ar tylli kini ki pynthor u bha u miat ki.

Share this:
Previous

E yukheiñ u Sanbor yei pynlut yaka T. 25 lak naka MLA Scheme heipor ka Lockdown

Next

Em 26 ngut kiwa lai khawai ha Shillong