Ka wi ka manbei kawa sah ha Mihmyntdu kawa tip kam ka Nimai Phawa kawa da yap ynne i step ka 13 tarik deiwa suba toh wa pasi hi ko, katwa neiliang u payu arbei yong ka u Arki Phawa da ujor FIR u pyrchah ya u Fortunate Pala (u kurim ka Nimai, ym em da ya chong) deiwa pynbaad wa uni u bru da pynyap dusmon u ka.
Haka ujor da ong u wa haka 30-06-2020 da ujor FIR pyrchah ya u Fortunate da ka Nimai Phawa neidaw wa dat wa choh u ka wei da lute u leh yaka poisa wa T.2,00,000. Tangwa hadien wa ki bor ka aiñ da yoh kem ki ya oo na Pharmer wei haka 01-07-2020 da ya suk noh (Compromise) ha Police Station Jowai deiwa daw pynuiñ ya ka poisa yong ka wei u ieh noh (Divorce) u ya ka Nimai Phawa.
Da pyntip wa hadien ini, u Fortunate Pala da maham siat u yaka Arki Phawa da ka suloi wei kamjooh ya kiwa yahkhmat ka chnong.
Da kam leh wa ynne ka 13 tarik wa da che wa chah pynyap ka Nimai Phawa ha u Fortunate wei hadien wa dep pynyap ya ka, da kdoh u da u tylle na rdang yong ka ha kamra yung yong ka hi kamwa pasi, wei da mih leh boon i snam kamjooh i dur ko leh man iwa da takha kamjooh leh cha doh cha pran ko.
Da pyntip leh wa hadien wa dep u pynyap ya ka Nimai Phawa, da rahbor u sa ya u khon yong ka na i thaw thiah u wei noh u oo cha ka wah wa em ha yingkieñ wa em ha Jowai Bypass kawa jngai kamwa 2.5 Km na yung sah yong ka. Tangwa uni u khynnah uwa dang 7 snem i rta da lait im u deiwa yoh u ksoh ya u chnat dieñ wei da ye u wow paar cha lait. Haka FIR da ong wa ya ini da pyntip pyn da u uni hi u khynnah.
