Ka seiñ kiwa synchaar chnong hapoh ka satri ka Synjuk ki Nongsynshar Shnong ka Bri Hynniewtrep (SNSBH) ynne ka sngi da dawa ko na u Montri Rangbah ka jylla, u Conrad K Sangma wow pyntip paidbah ya ka bui (Report) hajrong i takit ya ki 41 ngut kiwa lai baam khawai chong kurim ha Khanapara, Assam deiwa dawa wow e leh ya ki pyrtuid kini ki 41 ngut cha ki bor chnong.
U Secretary ka SNSBH, u RL Blah da ong u wa ka sorkar toh u pynmih paidbah ko ya ka bui takit, wei lada ka sorkar ymye ko wow pynbna daw dooh ko yei chaniah na kiwa boon deiwa pynrap leh wa daw pyntlot ko ya kiwa synchaar chnong wow kreh ki waka sorkar.
U Blah da ong u wa ka Synjuk da phylla ko wa ki 41 ngut da lai ki cha ka thaw khawai du hapoh ki 5 kari deiwa dawa wa ka sorkar toh u phah ko ya ki pyrtuid ki 41 ngut cha kiwa kitkaam chnong wa ki thaw sah yong ki khnang wa ki bor chnong u ye ki wow chimkhia hajrong ini.
Chooh chooh da ong u wada yaklam hajrong ki Entry wa Exit point hadien wa wan psiah ka truck na Haryana chadooh cha sor Shillong, khlem chah takit ya ki ha kini ki thaw deiwa pynrap wa ka sorkar emkam ko leh wow ekti ha ki bor chnong wow leh yeiwa emkaam yow pynsuk ya ka sorkar.
Da kyntu leh ya ka sorkar wow pyntip cha ki dorbar chnong ya kiwa yoh COVID-19 khamtam cha ki chnong wa em wa chah ktah.
U Blah da pyntip u leh wa ka Synjuk da yaklam ko wa ka sorkar hajrong i eh i khoo ki wakreh ka North Eastern Indira Gandhi Regional Institute of Health and Medical Sciences (NEIGRIHMS), deiwa pynsñiaw wa kani ka thaw sumaar toh u bahkhlieh ko ya ki wakreh yong ka.
