Shillong: U montri wa pait ya ka chnat puræ puthi ka jylla, u Lahkmen Rymbui da pyntip u wa ka sorkar da pynkhreh ko kattæ lada hap wow wai noh ya ki skur, deiwa pyntip leh wa ka chnat da pynbait thymme ko ya ki lynnong yong u snem 2020-21 wei ki wow pteiñ biang leh ha u snem wow wan.
Kam wow pynkynmoo wa ka sorkar jylla da phah khang ko ya waroh ki skur wa ki College ha ka jylla nadooh ka 17 tarik u Wisu ha uni u snem wow yada na i poor yong ka khlam COVID-19. Hadien wa palat soo bnai wa da khang ya waroh ki thaw puræ ha ka jylla, ka sorkar da pynkhreh ko wow wai biang deiwa bood ryntih leh ya ki kyndon wa da phah da ka chnat i chait i khiah, tangwa ya ka rai wa khaddooh, chong ko ha ka Ministry of Home Affairs (MHA).
U Rymbui hawa klam ynne ka sngi da pyntip u wa i wai ya ki skur ye ko wow man ha kiwon kiwon ki por ha uni u snem, wei ka sorkar da phah ko leh yei e yumut cha ka sorkar bei lyngba ka Department of School Education and Literacy yong ka chnat Human Resource Development (HRD).
Ha ka chithi wa da phah cha ka sorkar pyrdi, u Rymbui da pyntip u wa sorkar da pynsñiaw ko wa ki bei ki pa yong ki khynnah dang salia ki wow phah ya ki khon cha ki skur, khamtam ya ki khynnah wa puræ ha ki Class wa dang khian neibhah wa ku kiwa yoh ya u COVID-19. Heiwa da pynsñiaw leh wa ki bei ki pa kwah ki wa ki skur u man ki kiwa chngaaiñ neibynta ki khynnah lada wai wa kiwi ki pynsñiaw neibynta wym chah ktah ki khynnah skur.
U montri da ong u wa ka rai kattæ chong ha ka sorkar India, lada ye næ ym ye wow wai ya ki skur, neibhah kamwa man hi, i nang i stad man i iwa emkaam wei ha i jooh i por i chait i khiah leh man ko kawa emkaam tam ya ki khynnah skur.
