Shillong: Ka chnat pulit ha East Khasi Hills da yoh ko hadooh T. 48.78 lak ka poisa nei daiñ kuna ya ki bru kiwa tyngkheiñ ya ki kyndon ha ki 4 bnai nadooh wa sdang ka Lockdown waka Curfew ha ka jylla wow yada na u khñiang COVID-19.
U Superintendent of Police ka East Khasi Hills, u Sylvester Nongtnger da pyntip u wa ha East Khasi Hills nadooh wa sdang ka Lockdown da yoh Register hadooh 59 tylli ki Case, wei da kem leh ya ki 253 ngut kiwa da leh pyrchah næ tyngkheiñ ya ki kyndon kiwa da booh wei da em leh hadooh 192 ngut kiwa da chah daiñ kuna lyngba ki challan wa da pynmih da ka sorkar.
Da pyntip u leh wa ya kani ka poisa wa da daiñ toh na ki 7275 ngut ki bru kiwa tyngkheiñ ya ki kyndon, kiwa khlem deiñ Mask wa kiwi kiwi.
Hajrong kiwa tyngkheiñ ya ki kyndon aiñ ‘Traffic’, kitæ ki wym bood ya i rukom pynlai kari ‘Odd wa Even’ Number, em kiwa da pynngat hapoh ka 188 IPC deiwa tyngkheiñ ya ka Curfew, wei em leh ki Case hapoh ka 102 ka Meghalaya Police Act wa kiwi kiwi.
Heijooh i por da pyntip u wa ya kiwa da chah kem, hadien wa da takit ya ki da phah noh ya ki cha ka ‘Judicial Custody’ neibhah ym chngaaiñ wow booh ya ki hapoh patok.
U SP da maham u leh wa ki pulit daw pynchitom ki ya ki bru kiwa leh pyrchah ya ki hukum wa ki kyndon wa da booh da ka sorkar neipor cheipor.
