Jowai: Ka Khasi Students Union-Jowai Circle (KSU-JC) lyngba ka Education Cell ynne ka sngi hapoh i yahkhmat u Morningstar Pasi kam u President, u Phrakihowni Thubru, Secretary ryngkat wa u Ohibait Dkhar, President ka District Body, da lai yachem wei da e dorkhat ki ha u DC ka West Jaiñtia wa ya u Waheh Chnong ka Dorbar Chnong Tympang Iawmusiang, heiyatoh wa i eh i khoo wa chem ki khynnah heiyatoh wow leh ya ki Admission cha ki Class waphær waphæ khamtam lyngba ki dukan wa em ha Jowai.
Ka seiñ da kyntu ko ya ki bor District kamjooh ya ka Dorbar Chnong wow pynyinsur ya ki kyndon neibynta kini ki dukan khnang wow suk ki khynnah, deiwa khlem kheiñ ya ka ‘Odd wa Even’ yow ye ki u wai neibhah wa boon ki khynnah wan ki na ki thaw wa em cha palat sor wow leh ya ki Admission yong ki lyngba kini ki dukan.
Neiliang u DC wa u Waheh Chnong ka Tympang, Iawmusiang da kular ki wow chimkhia yeini neibynta i bha i miat wa i myntoi ki khynnah.
Chooh chooh ka seiñ da kyntu ko leh ya waroh ki dukan Cyber Cafe kiwa leh ya ki Online Admission wow bood ryntih ki ya ki SOP namo ki kyndon wa da booh ka sorkar lyngba ka chnat i chait i khiah wow yada na u khñiang COVID-19.
Da kyntu ko leh ya ki khynnah wa ymtoh u yalang ki chithaw don ha i jooh i dukan khnang wa ki tre dukan leh u ye ki wow bood ryntih ya ki kyndon wa da booh ka sorkar.
