Hadien wa em kawi ka wakreh yong ka Blood Bank kawa em ha Panaliar, Jowai da chah ktah ko ha u khñiang COVID-19 kamtæ ki bor sorkar lyngba ka chnat i chait i khiah da phah khang chwa ki chipor ya kani ka thaw.
Ynne hawa yaklam waka Medical Superintendent ka Civil Hospital Jowai, ka Doctor R. Pohrmen da pyntip ko wa ya kani ka Blood Bank daw wai hapoh chitayaw neibhah katkam wa man katni dang pynkhooid ya ka wei kamjooh leh ki wakreh emkaam ki wow leh ya ka Isolation wei emkaam leh wow leh ya ka Contact Tracing.
Heiyatoh wa lada em kiwa thiah kjut/chah sumaar kiwa emkaam snaam, ka Dr. Pohrmen da pyntip ko wa da pynkhreh ya i thaw booh snaam namo ka Blood Storage, wei lada em kiwa emkaam snaam na kiwi ki thaw sumaar, ye hi wow e ya ki, tangwa lada i emkaam man i iwa boon tæ ye wow duna i snaam wa da pynyang wa da booh, deiwa pynrap leh wa kiwi ki Hospital leh emkaam ki wow booh ki ya ki Blood Storage ki yong ki hi.
Heiyatoh won wa lada em kiwa kwah wow e snaam sñiawbha namo wow su salan (Replacement) ya i snaam, da pyntip ko wa lada em kiwa kwah u e snaam sñiawbha, haap yang ki hadooh wa da wai biang kani ka Blood Bank wei kiwa toh u su salan leh u man i kamjooh hi.
