Jowai: Ka Iawmusiang da man ko kawi na ki phang kawa kongsan tam ha Ri-loom Jaiñtia nadooh i por Election MLA, MDC wa kiwi kiwi, da man ko leh ka phang parom ki bru lada ha i kaam sñiawbha næ sñiawsih la hei khawai næ hei yap, wei ynne ka sngi kani ka phang da man ko kawi na ki phang wa pynkhai chkoor ya waroh ki MDC.
Ynne ka sngi heipor wa man ka Dorbar L’yur ka JHADC, u Lakhon Biam da kylli u na u EM wa pait ya ka chnat Civil Works Department (CWD), u Phasmon Dkhar hajrong ki kaam wa yatoh wa ka Iawmusiang heiwa da kylli u yei heh i thaw (Plinth Area) wow chna yaka Iawmusiang katkam ka Detail Project Report (DPR), heiwa da jubab wa heh i kamwa 17,229 Square Metre, i heh yong i thaw wa da khloh da pynmadan neibynta u chna ya kani ka yaw, da jubab wa i thaw heh i kamwa 3,0375.55 Square Metre.
Ka poisa wa da mang wow pynlut neibynta kani ka yaw toh T. 2,009.63 lak heiwa 90% toh ka poisa na ka sorkar pyrdi katwa 10% won na ka sorkar jylla.
Hadien kini ki jubab, neiliang u Lakhon da pynrap u wow kylli heiyatoh wa i daw wa sahteiñ wow chna ya kani ka yaw deiwa pynkynmoo ya ka dorbar wa u montri rangbah ka jylla (Conrad Sangma) ha kini ki bnai wa dadep da kular u wa ka sorkar u pyntikna ko wow pyndep u chna ya kani ka yaw, wei yeini neiliang u Phasmon da kubur u.
Chooh chooh u Lakhon da kylli u wa katkam wa man, ka sorkar da kular ko wow e (salan) hadooh T. 12 Klur wow chna pyndep ya kani ka yaw, neiliang u Phasmon da kubur u yeini deiwa pynrap leh wa neidaw wa em kani ka khlam u COVID-19 da rap suki ini waroh wei dei mynsien wa skem da yooluti u wa i kreh daw sdang biang i ha kani ka yaw.
