Ynne ka sngi ha ka Dorbar ka JHADC, u Lakhon Biam da kylli u na u CEM ka JHADC, u Thombor Shiwat uwa man leh u EM wa pait ya ka muna tyngka (Finance) ka Council heiyatoh wa waroh i yoh poisa (Receipt) ka Council nadooh ka 1 Wisu (March) 2019 hadooh ka 30 Naiynru (June) 2020 kawa man ka Financial Year ka Council ha uni u snem (neidaw ka khlam u COVID-19 da pynyinsur ya ka), neiliang u Thombor da jubab u wa ka poisa wa da yoh daman ko T. 59,49,93,226.
Hadien ini u Lakhon da kylli biang u yei pynlut poisa (Expenditure) ka Council hapyrdi kini ki jooh ki tarik heiwa da jubab u Thombor wa da pynlut hadooh T. 78,53,22,433 iwa mut da pynlut tam (Excessive) hadooh kamwa T. 20 Klur na iwa yoh ka Council.
Hajrong ini waroh neiliang u Lakhon da kylli u wa neiwon yoh ka Council ya kani ka poisa (T. 20 klur) yeiwa u Thombor da jubab u wa ya kani ka poisa da chim salan (ram) na ka SAG kam chibynta wow pyndap hei wow su ya ka tulop ki wakreh ka Council.
Heiyatoh wa ini i jubab u Thombor, neiliang u Lakhon da pynrap u deiwa kylli lada em ki kyndon (Guidelines) ha ka SAG wow chah u pynemkaam chwa (Divert) yaka poisa neibynta kiwi ki kaam wa da mang chwa kam ki kaam pynroi wei neiliang u Thombor da jubab u wa ym em kiwon kiwon ki kyndon wa kdoh namo kiwa khang yaka Council wow pynemkaam chwa ya ka poisa na ka SAG cha kiwi tawon ki kaam.
Chooh chooh u Thombor da ong u wa ini i leh ka Council man i katkam i ka rai ka Executive Committee wei man i leh neibynta i bha i miat ka Council waroh kawi.
Hajrong ini i jubab u Thombor, neiliang u Lakhon da pynkut u deiwa ong wa ini i leh ka Council daw pynkhia chooh chooh ko ya ka yukit wa ka lyngkor ka Council heiyatoh wa ki kaam poisa polaiñ ha ki por wow wan hanlada oo ym em pyrchah u yei pynemkaam ya kani ka poisa wow su ya ki tulop cha ki wakreh ka Council.
Neiliang u Thombor da kular u wow pynbait noh yeini waroh.
