U Dr. Aman War, DHS (MI) ka jylla hawa jubab yei chah pynbaad wa tkoh ka chnat i chait i khiah wow yaleh pyrchah yaka khlam COVID-19, da kyntait u yeini wa da pynbaad leh da u MLA ka South Shillong u Sanbor Shullai deiwa ong leh wa nadooh wa sdang da pyrchang ki wow pynbiang yaki thaw sumaar ha waroh wei ini i pynbaad man leh kamwa ym em burom ya kiwa em hakhmat dooh wow yada na kani ka khlam.
Da ong u leh wa i kreh wow yada ym em kut ko du haki Hospital wei da lai leh yow yachem yaki bru wei ini i lai yachem ym toh iwa kut du hei ktien donhi, heiwa da pynsñiaw u leh yei burom ya u montri i chait i khiah uwa lai lang wow yachem ya ki paidbah wei ym em chong du hapoh ka kamra krehkaam.
Deiwa ong u leh wa em hi i duna heini heitai, heiwa da em leh kiwa kawang moo yaki kamjooh leh kiwa pyndeiñ syntu, wei da ap da sñiaw ki leh yeiwa e yumut ki paidbah wei katwa dang lai chakhmat leh ki dang tip ki iwa thymme wow yakhun pyrchah ya kani ka khlam wei kani ka kaam ym toh du ka chnat i chait i khiah wa embynta, da ya krehlang wa kiwi ki chnat sorkar kamjooh leh wa ki chnong ki thaw. Wei i beiñ ya ini man ko leh wow beiñ ya kini waroh.
Chooh chooh da ong u wa iwa da e da leh kiwa em hakhmat (Frontline Workers) wow yakhun ya kani ka khlam khlem da pyrkhat yei yong ki hi samen, da pynyoh ko yaki da i pyrtuid kam ki chipai wei i chah pynbaad toh iwa ym ye u pdiang.
Da ong u leh wa ki wakreh da kreh ki na mynsien wei ym ap ki ya kiwon kiwon kiwa pyndooh mynsien yaki ha kani ka kaam.
