Ka chnong Lakadong lyngba u F. Rymbai, Waheh Chnong, da e khublei ko ya u Dr. Sankey Shangpung hadien wa chah jied u kam u Chairman wa thymme ka Jaiñtia Hills Autonomous District Council (JHADC).
Ka chnong da sñiaw ko wa u Dr. Sankey Shangpung em hok u wow yoh yaroh hajrong i mynsien wa da ktah u lyngba ki kaam chakri yong oo wa i kreh u neibynta i bha i miat, i thrang wow wanrah ya i chongsuk chong chngaaiñ wa i kreh chitom wow kyntu kynrong ya i roi i paar ki chnong ki thaw, wot hapyrdi i chem moochynthut ka District Council.
Kam uwa mihkhmat da pynyoo u ya ki sap kam uwa yahkhmat paidbah ha kiwa boon ki bynta ha ka imlang ka sahlang kiwa ki paidbah yooluti ki.
Ka chnong da kitbok kitrwiang ko ya u Dr. Sankey Shangpung wow dang ku u chaphrang cha kliar ki loom deiwa pyndem ya waroh i eh i khoo kam uwa yahkhmat.
Chooh chooh ka chnong ka da kyrmen ko wa u u Dr. Sankey Shangpung u man u uwi na ki bru wow pynpoi thong ya ka JHADC hapyrdi i chitom saja wa lai luti ko katni.
