Hadien wa mih chiboon i pyrchah hajrong i thmu wow chna ya ka karkhana Coke da ka M/s Unique Coke ha Wah Deinlin, kawa em ha Elaka Rymbai da mih chiboon i pyrchah hajrong ini i thmu da ki seiñ wa ki paidbah.
Ya kani ka karkhana da thmu wow chna ha i thaw wa haap hapyrdi ki soo chnong wa kynthup ya ka Umsatai, Ladwahwapung, Deinsatlang wa Pynurkba.
Hajrong ini i pyrchah da mih leh ki seiñbhalang wa boon hapoh ka satri ka Joint Action Forum (JAF) wow pyrchah wow chna ya kani ka karkhana.
Hadien wa mih ki ujor hajrong ini i thmu ka JHADC kawa da e ya ka NOC wow chna ya kani ka karkhana, da chong yalang (Executive Meeting) ha ka tayaw wa dep wei da rai ko wow pynman ya i takit hajrong kani ka kaam.
Chooh chooh katkam ka yutip wa da yoh da ong wa ha ka yalang da rai leh wow phah hajir (Summon) ya ki Waheh Chnong wa ki Secretary chnong kini ki soo chnong khnang wow chem yeiwa sakhiat wei wow chim ya ka rai katkam wa kwah ki paidbah.
