Shillong: U MDC ka Mawlai Constituency, u Teiborlang Pathaw da beiñ joor u yei toor pood wei kam thaw ki pulit CRPF cha ka khloo sorkar kawa haap hapoh ka chnong Mawlai Phudmuri. Hajrong ini, da ong u wa ha ka sngi nyngkong daw ujor cha u Montri ka chnat khloo uwa pait leh ya i kaam pohyung ka jylla, u Lahkmen Rymbui yow tuklar u.
Da pyntip u wa ki CRPF kiwa em ka ktem yong ki ha pchem ka Industrial Estate ha Lumjingshai da tympiah ki ya i kynroh deiwa chna won ya ka paikhana ha katai ka khloo, wei ym du ini, da chang ki cha waroh kawi ka khloo wei da lai chadooh Umpynthor iwa da wanrah leh ya i wym chngaaiñ ya ki khynnah wa ki manbei kiwa lai tongum wei sait-that heitai i thaw.
“Ini i leh yong kitai ki CRPF da pynpra ko ya i khloo ha katai ka chnong, wei da wanrah leh ya i wym chngaaiñ ya kiwa chong chnong neibhah wa ki pulit CRPF da chang uiñke ki leh ha katai ka khloo,” da ong u.
Katkam i ong u MDC, ini i kam thaw yong ki CRPF ha katai ka khloo da neh ko kattu katni por, wei neiliang ka dorbar chnong leh da ujor ko cha ki bor wa toh u pait, tangwa ym bna ki.
“Hadien wa nga yachem O wa u Montri, daw lai leh wow yaklam wa u Commandant yong ka 67th Battalion ki CRPF wow dawa sangeh ya itai i kam thaw,” ong u Teibor.
U Teibor da pyntip u leh wa ya katai ka thaw da thmu wow chna kam ka Health Park, tangwa da pynrap u wa lada kini ki CRPF da kam ki ya itai i thaw, ini i thmu daw sepai noh ko.
