Kam chibynta wow pynjanai ya ki thaw sumaar wa em hapoh ka Amlrem Sub-Division, ynne ka sngi u montri ka chnat i chait i khiah ka jylla, u AL Hek chirup wa u montri ka chnat ki kaam pohyung ka jylla, u Lahkmen Rymbui uwa man leh u MLA ka thaaiñ da lai pait lai sylli ki ya ki thaw sumaar wa em hapoh ka Amlarem Sub-Division.
Ini i lai syilli da sdang i na Jarain PHC, Padu State Dispensary wa ka Pdengshakap PHC wei hadien ini da pynbood won sa cha Nongtalang CHC wa Dawki PHC.
Ha ini i lai sylli da emlang leh u DHS (MI) u Dr. Aman War, u DMHO ka West Jaiñtia Hills, ka SDO ka Amlarem Sub-Division, ka J. Kharpuri, u SDPO, u Donkupar Moksha wa kiwi kiwi ki heh na ka chnat i chait i khiah.
Ha Nongtalang CHC hawa pynsñiaw yei emkaam kani ka thaw sumaar, u Dr. Kordor Mukhim da ong u wa iwa emkaam dooh ha kani ka CHC toh ka Ramp namo ka luti lai ki bru wa da heh rta wei wow pynlai ya ki Wheelchair wa Stretcher.
Chooh chooh da pyntip u wa da emkaam leh ya ka kari 108, ka Canteen, ka Ultrasound wa kiwi kiwi heiwa da pyntip u leh wa kani ka CHC e chakri ko ym du ya ki thaw wa haap hapoh ka Jaraiñ PHC tangwa wot kiwa em cha East Khasi Hills leh kamjooh neibhah wa da em ki bru kam na Umsyiem kiwa wan chah sumaar heini katwa kamtæ da kyntu u wow pynbiang yeiwa emkaam wow ye u chakri pura ya ki.
Na Nongtalang da lai sylli won sa ya ka Dawki PHC heiwa kamwa da leh ha kiwi ki thaw sumaar ynne ka sngi, ki montri da lai yachem ki wa kiwa thiah chah sumaar ha kani ka PHC.
Ha Dawki PHC neiliang u Incharge yong ka, u Dr. Simon Khonglah da ong u wa em chiboon i emkaam ha kani ka thaw sumaar khamtam neidaw wa man ko ka Center wa khian kamtæ emkaam bha wow pynheh wei wow chna pynmiat ya ka neibhah boonsien da wan thooh dawai leh ki bru kiwa em cha chiliang ka Wah Mynngot na East Khasi Hills.
Chooh chooh da ban joor u leh wa emkaam leh wow pynheh wei wow pynkhlan ya ka Laboratory neibhah wa kani ka thaw em ko ha khappood kamjooh leh wow pynbiang ya i bordiñ khnang wow lait ki dawai u sih.
Heijooh i por da ban joor u wa emkaam bha u em ki bru ha ka kyrdan Grade IV wow pynkhooid pynjngiar ya ka neibhah i khooid man i iwa kongsan tam ha i chait i khiah.
Hajrong ini neiliang u AL Hek da kular u wow leh yeiwa emkaam lada chah i thaw neibhah neini daw chna pynmiat ya u sarok Dawki ha ki por wow wan.
Da ong u leh wa daw pynkhlan ya i rukom krehkaam ka Laboratory ha kani ka thaw sumaar wei daw chong pyrkhat ka chnat heiyatoh wa i thung kreh ha ki kyrdan Grade IV.
Neiliang u Hek da ekhublei wei da yaroh u ya u montri ki kaam pohyung ka jylla uwa man leh u MLA ka thaaiñ uwa da chimkhia wow wanrah wow sylli ya ki thaw sumaar wa em hapoh ka Sub-Division.
Khaddooh da pynbna u leh wa ka sorkar da rai ko wow e ya ka Generator ha kani ka thaw sumaar.
U Lahkmen Rymbui da ong u wa ynne ka sngi da man ko ka sngi kawa jop heiwa da ye u wan sylli ya ki thaw sumaar wa kynthup ya ka CHC, PHC wa Dispensary hapoh ka Sub-Division neibhah waroh ki bru da yaroh ki yei rukom krehkaam ki thaw sumaar nadooh na Jaraiñ, Padu, Shkentalang, Nongtalang wa Dawki.
Da kyntu u leh ya ki paidbah wow man ki kiwa krehlang chirup wa ka chnat i chait i khiah kamjooh wa ki bor sorkar khamtam ha ini i por wow jop ya ka yamhun pyrchah ya ka khlam u COVID-19.
