Ynne man ko ka sngi wow sah khana parom ya ka Khliehtyrshi Primary Health Center (PHC) heiwa da yoh ko ya ka kari kit wakjut namo ka Ambulance lyngba ka Chief Minister’s Relief Fund (CMRF).
Kani ka Health Center toh kawa da wai nadooh ka 20 Kmaichonglad (December) 2002 wei e chakri ko ya ki palat 20,000 ngut ki bru na ki 19 tylli ki chnong.
Chwa wow ekti ya kani ka Ambulance da em ka yalang wa tbiang heiwa u MLA ka 2 Jowai Constituency, u Wailadmiki Shylla da man u kam u kongsan hei emlang u MDC ka Khliehtyrchi, u Lakhon Dkhar, u MDC ka Jowai South, u Saron Paswet, u MDC ka Jowai North u Brightstar Chyrmang, u MDC ka Mukhla, u Ailad Bhoi, u MDC (Nominated) ka JHADC u Octomewot Lamin wa u DM&HO ka West Jaiñtia Hills, u Dr. KC Ajar.
Ya ka yalang ynne ka sngi da pynlai da ka Dr. Sakahica Dkhar kawa man kam ka MO yong kani ka Health Centre wei da yoh ya ki kyntien pdiang burom na u Dr. KC Ajar.
Da yoh yei klam na u Waheh Chnongka Khliehtyrshi, u Kitbok Rymbai heiwa da kyntu u ya ki paidbah wa kiwa pynlai ya kani ka thaw sumaar wow kit ya ki bru kiwa emkaam hok ya kani ka kari wei kiwi tawon kiwa ym em ware u chitom ye wow kit ya ki da kiwi tawon ki kari.
U MDC ka Khliehtyrchi, u Lakhon Dkhar hawa e yei klam da khana u ya ka parom kani ka thaw sumaar, heiwa da ong u wa ha u 1986 da soi ya ka soskular hapyrdi ka Dorbar Chnong wa ka chnat i chait i khiah heiwa da booh ya ka Sub Center, da pyntip u leh wa ha u snem 1997 da soi soskular biang ki neibynta ka PHC wei da booh ya u mooyurim wow chna ya kani ka thaw da u Kitdor Syiem uwa man u montri ka chnat i chait i khiah wei ha ka 20 Kmaichonglad u 2002 da wan wai ya kani ka PHC da u Sing Mulieh uwa man kam u montri ka Science & Technology.
Heijooh i por da ekhublei u ya u Wailadmiki Shylla uwa da kreh chitom wow ye u wanrah ya kani ka Ambulance ha kani ka thaw kawa man kawi na i emkaam wa kongsan dooh yong ka.
Neiliang u Wailadmiki, da e u yei yaroh wei sñiawngooh ya u montri rangbah ka jylla uwa da kreh chitom wow e ya ki kari Ambulance cha ki thaw sumaar ha kylleiñ ka jylla. Da pyntip u leh ha ka yalang wa uni u sarok wow poi cha kani ka thaw man u uwa da sih da jæd, kamtæ da kyrmen u wa ha kini ki sngi wow wan ka chnat PWD daw khut ko wow chna pynmiat noh da u sarok uwa miat.
Da pynrap u leh deiwa ong wa em chiboon i bynta iwa dawa ki thaw sumaar tangwa u e chisien e, man i iwa eh, hanla kattæ leh da kyrmen u wa daw yaleh u pynbiang yei emkaam yong ki.
Chooh chooh u Wailadmiki da ekhublei wei da yaroh u ya kiwa yahkhmat ka chnong kiwa nachwa kiwa da chynna jngai yei emkaam i chait i khiah kiwa da thooh luti wow wanrah ya kani ka thaw sumaar heini.
