Da lehkmen yaka Teachers’ Day da ka chnat puræ puthi

Shillong: Ka chnat puræ puthi ka jylla Meghalaya ynne ka sngi da lehkmen ko yaka sngi wa kyrpang kiwa sikai kawa tip kam ka 59^th Teachers’ Day haka yalang wa pynman ha Shillong Public School, Laitumkhrah heiwa u montri ka chnat puræ puthi u L. Rymbui da man u kam u kongsan hei emlang u D.P. Wahlang, Principal Secretary wa kiwi ki sahep ka chnat puræ puthi.

Ha kani ka sngi da pynkup burom leh ya 13 ngut kiwa sikai na ki skur waphær waphær kiwa yoh yaka State Award for Teachers wa 3 ngut kiwa yoh yaka District Award ha East Khasi Hills District.

U L. Rymbui hawa e yei klam da e khublei u ya waroh kiwa chah pynkup burom kiwa da e yei chakri wa bha tam neibynta ki khynnah, khamtam ha kini ki por wa em ka khlam COVID-19. Da ong u leh wa deiwa pynkrehkaam ya ka Education Policy wa thymme ka sorkar pyrdi waka sorkar jylla, kiwa sikai daw chem ki ya kiwa thymme ki loom wa hap ki wow ku, wei da kyrmen u wa daw yieñ ki yow jop yeini iwa daw hap leh ki wei wow smat u pynkhreh yow ye u pdiang ya iwa thymme iwa man leh i rukom maan ka kaam puræ puthi kawa kylla kawa ym jooh neh kamjooh bait.

U Rymbui da ong u leh wa ka chnat dang pait ko yei eh i khoo yong kiwa sikai hanla ka luti wow lai chakhmat ym toh iwa suk tangwa da rai skem wa u pynbait smat ya waroh ki kaam.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

U D.P. Wahlang leh da yaroh u ya waroh kiwa sikai yei chakri ki ym du ya ka chnat, ka sorkar wot yaka imlang sahlang waroh kawi.

Chooh chooh da ong u wa i em ka khlam COVID-19, ka sorkar jylla da sdang ko ya kiwa boon kam ki Online Class katwa ha ki thaw wa ym em biang ka Internet, khamtam cha ki thaw wa em cha palat sor, kiwa sikai da lai ki cha ki yung ki khynnah wei da em leh i yachem lang wa ki khynnah ha chi thaw yow e yei sikai. Da pyntip u leh wa neibyna ki Class 1 hadooh Class 12, ya ki Board Exam daw pynman hapoh ka jylla deiwa kyntait 30% ya ka Syllabus heiwa ya i yutip wa bniah daw pynbna hapoh uni u bnai.

Ha kani ka sngi ya ka Special Award for Teachers Teaching in Inclusive Schools da e cha ka Nostina Thein, Special Educator na Mary Rice Centre for Special Education. Ya i naam Best Scout Master da yoh u Akin Ryan Mawphlang na H .L. Mizo Secondary School katwa yei naam Best Guide Captain da yoh ka Banylla F. Swer, Shilong Headquarter.

9 ngut kiwa sikai da pynkup burom ya ki yei emkti ki haka DIKSHA ka esikai lyngba ka Digital Mode kawa da pynchlur da ka Ministry of Education, Government of India.