Shillong: Hadien wa pyntip u District Surveillance Officer wa u Incident Commander, Zone-II, wa da em 3 ngut kiwa yap ha thaaiñ Laban ha kini ki 10 sngi kiwa sah ha Riat Laban East hajan ka thaw tlep-bru ki Muslim, kiwa sah hadein ka Laban Sports Club wa hadien ka St. John’s Church heiwa na kini, arngut toh kiwa yap ha dong Madan Laban heiwa waroh le da khlaad ki chwa wow poi cha Hospital.
Heiwa da ong wa kini kiwa khlaad toh kiwa ye u yarap lada chem smat yaki, kamtæ yow ye u leh ya ini kamjooh yow lait i poor kani ka khlam deiwa lai ha iwi pa iwi i yung yow chem ya kiwa chitom, da emkaam wow khang kset ya kini ki thaw yow pyntikna wa ki bru ym mih ki cha lait.
Kamtæ ka District Magistrate ka East Khasi Hills da pynbna ko ya ka Riat Laban East waka thaaiñ St. John Area kiwa haap hapoh ka Madan Laban kam ka Containment Area nadooh ka 11 tarik uni u bnai.
Ha iwi tawon i liang, hadien wa em 29 ngut kiwa yoh COVID-19 na ki 9 tylli ki manyung ha i Compound u Birma Jalan iwa em pyrchah yaka Income Tax Quarters, ha Income Tax Quarters-3, Type 1 Building wa ha i yung u Chandrama Ram (iwa em ha i Building u Phani Das), Keating Road.
Ka District Magistrate, East Khasi Hills da pynmih hukum ko haka 11 tarik uni u bnai yow pynbna ya waroh kawi ka thaaiñ Keating Road nadooh na Jha Fruit Stall, Khyndailad hadooh ha New Employment Exchange Building wa kynthup yaka Mohan Makin’s Road (wa kynthup ya ki dukan kiwa em mar pyrchah yaka yung krehkaam u Superintendent of Police, Shillong hadooh Saigal Motors) kam ki Containment Area.