Shillong: U montri wa pait yaka chnat Social Welfare wa kiwi kiwi u Kyrmen Shylla ynne ka sngi da sdang u yaka State Nasha-Mukt Bharat Campaign haka yalang wa pynman ha Yojana Bhavan, Main Secretariat, Shillong. Ka thong kani ka Campaign kawa da pynwan dur daka Ministry of Social Justice and Empowerment, Government of India toh wow pyndooh jait ya kdoh i khoom i Drugs yaka imlang sahlang.
Katkam ka bui (Report) wa pynmih hajrong ka phang Magnitude of Substance Abuse in India 2019, ha Meghalaya kiwa dih kiad da em ki 3.4%, Cannabis 1.68%, Opioid 6.34%, Sedatives 0.95%, Cocaine 0.05%, Inhalants 0.8%. Ki District ka East Khasi Hills, West Jaiñtia Hills, West Garo Hills wa South Garo Hills da jied kam ki District wa chah ktah dooh na i Drug.
U Kyrmen hawa e yei klam da ong u wa i Drug kamjooh kiwi ki jait pynmuaid toh i kaam wa khia bha hapoh ka jylla iwa da ktah ya ki manyung mansem kamjooh yaka imlang sahlang. Da pynsñiaw u leh yei sñiawkhia yeiwa ku kiwa chah ktah ha ki jait pynmuaid hapoh ka jylla waka ri iwa da wanrah yaka sorkar India wow sdang ya kani ka Campaign.
U montri da pyntip u leh wa ki District Nasha Mukt Committees wa da chna hapoh ki District ka jylla u kreh ki ym du wow e yarap, e kyrchaan kamjooh yow kynjoh ya kiwa emkaam yarap ha ki District wa da jied. Kini ki Committee leh daw pynman ki yaki pynsñiawthooh paidbah kam ha ki skur waki College, u lai yarap ya kiwa da chah kdoh chah khoom ha kini ki kaam wei yow li booh yaki cha ki Rehabilitation Centre lane ki thaw sumaar yow yoh ki yei syllok wa kiwi kiwa emkaam ki yow jop ki ya ini. Chooh chooh kini ki Committee u pynman ki yaki yalang wow pynchlur yaki chnong ki thaw wow ya krehlang ki ha kani ka thong.
Ha kani ka sngi u montri da pynlait u leh yaka Meghalaya Drug Abuse Prevention Policy 2020.