Shillong: Kam chibynta kam wow pynchlur ya ki khynnah hei puræ puthi ka Nongkrem Constituency, ynne ka sngi da pyndep yei pynkupburom Nongkrem Constituency Academic Excellence Award 2020 da u Lambor Malngiang, uwa man u MLA/MDC ka Nongkrem Constituency uwa man leh kam u Chairman ka State Planning Board.
Ya ini i pynkupburom da leh ha Salem Secondary School, Laitkor.
Waroh da em 31 ngut ki khynnah kiwa da yoh 75% chaneiñ ha ki Board Examination 2019-2020, heiwa da pynkup burom da ki Momento, ki Certificate wa ka song poisa wa T. 10,000 ya kiwa mih pyrtuid wa T. 5000 ya kiwa yoh 75% chajrong.
U Lambor hawa e yei klam da ebuit u wow sdang noh sa ya ka Academic Excellence Award wow pynchlur ya ki khynnah wow pteiñ ki yei puræ yong ki wei wow man ki kiwa minot.
U Block Development Officer of Mylliem C&RD Block, u Peter T Passah da yaroh wei pynchlur u ya ki khynnah wow pynemkaam ya i sap yong ki, wei yei jooh da ban leh da u Block Development Officer ka Mayryngkneng C&RD Block, u Ronnie Wahlang deiwa pynrap leh ya ki wow chim kabu yeini khnang wow myntoi ka yung ka sem wa ka imlang sahlang waroh kawi.
