15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Wa da chem yei sakhiat, da burom u waheh shnong Sohmynting ya uwa pynkreh yaka Scheme chna paikhana

Advertisement ad1
Advertisement ad1
Advertisement ad1
Advertisement ad1

Jowai: Man ko kayi kayi ka khubor kawa yoo danda u yoo wa u waheh chnong ka Sohmynting u Lephing Pyrtuh da hap u wow da burom da oo yei emkti bamsap ka Scheme chna paikhana ha chnong Sohmynting du neidaw wa u Mynjurlang Lyngdoh u Chairman wa pynkreh ya katai ka Scheme heipor wa man u kam u waheh chnong ka Sohmynting wym nood de u wow mih chakhmat neibhah wa da oo hi leh da sñiawthooh che u yei sakhiat.

I sakhiat wada tikna chooh chooh toh hadien wa mih ka khubor wada chem lyngba ka RTI yei bamsap na katai ka Scheme heiwa neiliang ka chnat Public Health Engineering RWS Division, West Jaiñtia Hills, Jowai leh da wan hiar ko cha chnong Sohmynting haka 3 waka 4 tarik uni u bnai yow pynman i takit markhmat waki paidbah wa yoh myntoi kamwa mih haka RTI wa yoh sakhiat hi ki mo yei hok kamwa toh u yoh ki.

Ha kitai ki arsngi wa wan takit ka chnat PHE da bhah yaki bru takit haki soo kynhun hei synran lang kiwa chong chnong, wei katkam i sakhiat wa da yoh u sakhi lang, boon kiwa yoh myntoi ym em yoh ki katkam ka hok wada mang yaki, neibhah hakhmat ki kynhun takit, ki paidbah da phla hok lut ki yei yi wa yoh næ wym yoh ki, la ki tiar næ ka poisa.

Iwa pynkhyrngiat wei sñiaw kjut nood chooh chooh wow chem heipor wa takit wa em ki manyung wot hawa da em pyrtuid ki haka List kam kiwa yoh myntoi yaka Scheme chna paikhana, tangwa hadooh ynne ka sngi dang lai paikhana taroi ki cha rood cha kiar neidaw wa paw du i pyrtuid khlem yoh iyi iyi.

Neitæ kamwa da pynsñiaw nachwa wa i baamsap du na u mooria, u chyiap loom, chyiap um, ki mooblok da khynjoh cha ki phaw lak khlem da kheiñ ya kiwi won ki tiar næ ka poisa. Yeini leh u paidbah da pynsakhiat u hakhmat ka kynhun takit yong ka chnat PHE wym em yoh ki.

Ha-o wym ye u len wa ya kiwon kiwon ki Scheme sorkar wa pynkreh hapoh chnong em ka Sub-Committee wada thung ya u Chairman, u Secretary deilang wa ki dkhot, tangwa ileh kdaw O ya u Mynjurlang Lyngdoh Chairman ka VWSC Sohmynting, toh neibhah wa ka RTI hi da pynyoo che ko wa ya waroh i su i tda (Cash Memo) wei yei pyrtuid kiwa yoh myntoi leh da pna soi hi u du samen khlem i embynta u Secretary ne ki dkhot.

“Nga kam uwa thooh RTI yieñ O haka yurim wow thooh yei sakhiat yei hok u paidbah kamwa da wan ujor ki cha nga, wym hajrong kawon kawon ka yurim kamwa da kynnoh da u waheh chnong, neibhah nga sñiawthooh oo wa kani toh ka daw wa khroo nei bynta i bha i miat wa i roi i par u paidbah ka chnong hi waroh kawi,” ong u Dapoi Pyrtuh.

Wow ong wa kani toh du i thooh daw donhi yeiwa da dep man iwa bakla, wei chwa u kynnoh kamni sñiawthooh chwa yi mut ka RTI.

Chooh choh hei yongsakhiat hi hawa ong u pynche ya katai ka Scheme toh u kdaw che leh ya katai hi ka Scheme wa kammon da pynkreh, wei hajrong kayi ka yurim da pynksan wym em itæ i baamsap, tangwa pynban da kdaw u chaki kaam ki wym emyatoh iyi iyi wa kani ka Scheme, heithaw u kynnoh i daw toh wa dooh waheh chnong O ha u snem 2019. I sakhiat hi yaka Election jied waheh chnong wym em de yakhun O hadien wa kut ka pali yong nga 3 snem katkam ka Sanat wa da e ka JHADC.

“Wow kynnoh wa nga toh uwa pynpra chnong uwa pyndooh burom ya kiwa kitkaam chnong du neidaw wa thooh O yei sakhiat, ini pynyoo yei biej u waheh chnong nalor wym kwah u wow pynku yaka chnong. Hei sakhiat chwa wow kynnoh toh u pyrkhat chwa u ya idæ wa iyi da dep pyndooh burom u haki snem nachwa ha Lumjingtep”.

Nga pathan thooh yutip hi-eh O yaka Scheme chna paikhana wei ka RTI hi kawa khana che ya kiyi kiyi waroh, kynthup leh i pynsakhiat na u paidbah.

“Neitæ iwa sñiawphylla wow yoo wa kat i kyrdan u waheh chnong wym sñiaw biej u mo pynda oo wow da burom yei kaam yong kiwi, ne boi wa embynta lang u ha katai ka baamsap? Neibhah katkam ka khubor wa pynche u da yoo wa da kup u samen donhi yei bor yong ka chnong khlem i rai yong ka EC næ i sur u paidbah wei ini pynyoo leh wa da lai lait u yaka kyndon synchaar paidbah,” pynrap u Dapoi Pyrtuh.

“Nang thooh ki laad ki luti yong me kammon wow da burom mi ya u Mynjurlang Lyngdoh, tangwa kynmo ki dak takha ha u paidbah wym khooid ki lymda yieñ phi haka yurim i hok wa sakhiat,” pynkut uwa thooh RTI.

Share this:
Previous

168 ngut kiwa dang yoh COVID-19, uwi wa yap, kiwa chait da poi ki 2020 ngut ha Meghalaya

Next

Da pynkup burom ya ki khynnah da ka Nongkrem Constituency Academic Excellence Award