Ynne i step ka National Investigation Agency (NIA) ka ri da lai kynreh (Raid) ko ya ki kattu katni ki thaw ha Ernakulam (Kerala) wa Murshidabad (West Bengal) wei da kem ko ya ki 9 ngut ki damok kieñ suloi wa yatoh wa ka Al-Qaeda.
Ka NIA hadien wa chemdien ko wa em ki dkhot ka Al-Qaeda wa kreh hapyrdi ki jylla ha ki thaw waphær waphær wei kini ki dkhot thmu ki wow hiar thma ya ki thaw hapoh ka ri, neiliang ka NIA da pynman ko yei takit hajrong ini.
Na kini ki 9 ngut, ka NIA da kem ko ya ki 6 ngut wa tip kam u Najmus Sakib, Abu Sufiyan, Mainul Mondal, Leu Yean Ahmed, Al Mamun Kamal wa u Atitur Rehman, na Murshidabad katwa ki 3 ngut wa tip kam u Murshid Hasan, Iyakub Biswas wa u Mosaraf Hossen, toh kiwa na Ernakulam.
Neiliang ka NIA da chem ko ya kiwa boon ki tiar kam ki kot ki sla, ki kot jihad, ki tiar pynmynsoo wa nep, ki tiar siat, ki kot kammon wow chna bomb wa kiwi kiwi.
Chooh chooh da chemdien wa kini ki damok toh kiwa da chah esikai ki ha ki dkhot ka Al-Qaeda wa em ha Pakistan lyngba ka Social Media wei da thmu ki wow leh ya ki kaam pyrchah aiñ deiwa hiar thma ya ki thaaiñ ka nongbah ka ri wa tip leh kam ka National Capital Region namo ki thaw wa em ha New Delhi.
Ka NIA da pyntip ko leh wa kini ki damok da sdang ki wow khrong poisa wa da thmu ki wow lai cha New Delhi wow thied tiar siat wa kiwi kiwi neitæ ye won ki wow leh ya ki kaam damok ha kylleiñ ka ri.
