Ka Raij Mynso ha uni u snem da pyndep ko ya ka lehniam Behkymphui heiwa ha uni u snem da pyndep yaka deiwa kñia da u masi.
Kani ka Behkynmphui toh kawa da leh chisien chi snem wei ha uni u snem ka lehniam da sdang ko nadooh ka 17 tarik uni u bnai deiwa pyndep ya ki lehniam wa boon rukom heiwa ha ka sngi sdang da pyndep ki ya ka Behdieñkhlam.
Ynne ka sngi pynkut ya kani ka lehniam chwa wow sdang ka bynta wow pyndep ya ka lehniam da em ka yalang wa tbian ha yung Seiñraij Mynso heiwa u Dolloi ka Elaka Jowai u Puramon Kynjing da man u kam u kongsan, katwa u Dolloi ka Elaka Raliang u Chawas Lyngdoh da man u kam u symbood kongsan.
Ya kani ka yalang da pynlai da u H. War, da yoh ya ki kyntien ngoohblai na u Langdoh, u Shaniah Lyngdoh wei da yoh leh ya ki kyntien na u P. Chen uwa man kam u dkhot ka Seiñraij Mynso, u K Myrchiang uwa man kam u Dolloi ka Elaka Mynso, u Standby Sari uwa man u Publicity Secretary ka Seiñkyntu Seiñraij 12 Dolloi wa ki kyntien ekhublei na u Elington Sungoh.
Kani ka Behkymphui toh ka lehniam ki khon ka Niamtre ka Raij Mynsoo chwa wow wanrah ya u kba u khoo na hali cha yung wei wow yada ya oo (kba) wa kiwi ki mar rep na i sih wa i baam khñiang wei khamtam leh wow yada ya ka chnong ka thaw, ka Raij ka Elaka na i kjut i chitom saja wa kiwi kiwi iwa man i sih iwa ye u ktah ya ka imlang sahlang.
Chooh chooh kani ka lehniam hajrong i yada, da pyndep ya ka leh wow engooh edem ya ki Blai ki Syiem, ki Blai Ryngkaw wow e ki yei yada kamjooh leh i kyrkhu kyrdoh ya ka imlang sahlang waroh kawi.
Ynne ka sngi hadien wa da kut ka yalang na yung ka Seiñraij da hiar won cha Yung Langdoh wow pyndep ya ka engooh edem wa i suit i choor yeiwa da pyndep da ki waheh ka Raij kam u Langdoh, u Dolloi wa kiwi kiwi.
Hadien wa pyndep yei suit i choor da mih na Yung Langdoh deiwa rah ya ki kymphui kiwa man ki dieñ wa da tah hei saphup wei da sæh ya ki ha ki kattu katni tylli ha Khloo Blai wei neini da lai cha yaw wow tyngkheiñ ya ki chken wa da pynthiah harood sarok kam ka dak wow tyngkheiñ ya ka khlam yeiwa da pynbood won sa i engooh ya ka Um Ñiawwyrnai kawa em ha yaw deiwa hiar cha kani ka um.
Na yaw da mih wow lai cha i thaw wa tip kam ka Dieñ Yirngam wow pyndep ya ka Kñia Syiemkhlam Syiem Dait kawa man ka bynta wa khaddooh yong kani ka lehniam Behkymphui deiwa e kñia da u masi.
Ini i kñia da u masi man i chisien soo snem (hadien man ka le snem) heiwa ha ki le snem da kñia da u sñiang katwa ha u snem wa soo won da kñia da u masi wei ini i kñia da pynchong katkam ki sngi yaw wa da kheiñ man u snem.
