U Montri rangbah ka jylla, u Conrad K Sangma da yaroh u yeiwa pdiang ya ka Farmers Bill da ka Parliament ynnin ka sngi deiwa ong u wa ini daw pynlaitlooid kani ka aiñ ya ki warep wei wow kyntu kynrong yei yoh i la ki.
Da kdaw u leh wa jooh em i e wai kamjooh i rep deiwa yasoi sorkular (Contract Farming) ya ki thaw nachwa, tangwa ym em ki kyndon wow bood ki yow lait nei chah chim kabu wei dei kyrmen skem u leh wa deiwa pdiang ya kani ka Bill daw yarap ko ya kiwa rep liang wanang.
Chooh chooh da ong u wa ka sorkar jylla ym pdiang ko ya ka Lockdown neibhah ymye ko wow pynkut (Solution) ya i eh na u COVID-19.
Da kdaw u leh wa ka Lockdown ymye ko wow pynkut tangwa pynslem pathan i yei buit ka sorkar neibhah wa da sdang pynkrehkaam ya ki Micro Containment wei i khayi pateiñ ymtoh u sangeh i.
Heiyatoh wa i ku kiwa yap na u COVID-19 hapoh jylla, da ong u wa emkaam ya waroh u sñiawthooh ki wa ka luti chaphrang toh du wow man kiwa syndong wei kiwa husiar wow bood ya ki kyndon sorkar.
Da pyntip u leh wa daw wai yaki 11 tylli ki Industrial Training Institutes hapoh ka jylla nadooh ka 24 tarik uni u bnai.
