Shillong: U Symbood Montri Rangbah ka jylla, u Prestone Tynsong da pyntip u wa ka sorkar jylla da dep phah ko da ka chithi cha ka Ministry of Education ka sorkar India wow thung noh da u Vice Chancellor wa pura ha North Eastern Hill University (NEHU).
Kam wow kdaw wa ka Joint Action Committee wa kynthup ya ka NEHUTA, NEHUNSA wa NEHUSU, da pynman ki da ka yakhih wow pynsñiaw yei pyrchah wow e por chooh yaka samoi krehkaam yong u VC, u Prof. S. K. Srivastava kawa da kut ynne ka 23 tarik, tangwa ini i pyrchah yong ka JAC ym em poi ko cha ka thong hadien wa u President ka ri da e por biang u ya u Prof. S. K. Srivastava sa chi snem lane hadooh wa yoh ya u VC wa pura.
Neiliang u Prestone ynne ka sngi da ong u wa ka sorkar jylla ym ye ko wow tuklar palat ya i kaam hapoh NEHU, tangwa neibynta wow lait na iwon iwon i eh iwa ye u ktah ya i burom yong katai ka skurbah wa paw ha ka thaaiñ Northeast, ka sorkar da pyntip ko yei long i man ha katai ka skurbah cha ka Ministry, deiwa dawa leh wow thung noh da u VC wa pura.
Da ong u wa ye u man wa ka Education Ministry dang pynbait ko ya ini i kaam iwa da pynman wow e por chwa chipor u krehkaam biang u VC, deiwa ban biang wa ka sorkar jylla ym ye palat ko wow tuklar neibhah wa ka NEHU ka haap ko hei pait yong ka sorkar pyrdi waka UGC.
