Jowai: Kam wa da yoh u sakhi wa katni ki sngi ki skur næ ki thaw puræ waphær waphær wow ya lailang katkam i yah ka juk stat wa thymme heiyatoh wow pynsmat, pynsuk pynjan yei rukom krehkaam ha ki dur ki rukom waphær da em ki ya ka Website, kamtæ leh ka Marianhill Higher Secondary School, Jowai kam kawi na ki chlem sikai warim hapoh ka ri loom Jaintia, ha ka thong wow kyntu kyrdan yei rukom krehkaam ka skur, ha kani ka 24 u Naikhynde da yohlad ko wow wai ya ka Website yong ka skur ya kawa da pyntoh pyntne da ka Dakamanbha Ryngkhlem, IT Engineer waman leh kawi na ki khynnah skur warim yong ka Marianhill Higher Secondary School.
Ha ka yalang watbian yong i wai ya kani ka Website wa man ha Vianney Hall, da emlang u Kyrmen Shylla, Montri ka sorkar wa pait ya ka Social Welfare Department kam u kongsan, u Michael Saioo kam u symbood kongsan, u Most Rev. Victor Lyngdoh, Bishop Jowai Diocese, u Rev. Fr. Hilarius Lamare, kiwa sikai wa kiwi kiwa chah khut sñiawbha.
Ya ka yalang da pynlai da u Telespar Shangpliang, Asst. Teacher, wei kam wow kdar luti ya ki bynta wa chakhmat u Rev. Fr. Hilarius Lamare u man leh u Secretary yong ka skur da e u i duwai sdang neitæ pynbood won ki kyntien pdiang burom na ka Linda Ryngkhlem, Asst. Lecturer Marianhill Hr. Secondary School katwa hawa kut ka prokram chwa wow wai ya ka Website u Most Rev. Victor Lyngdoh, Bishop Jowai Diocese da e u i kyrkhu duwai pynkut.
U Michael Saioo kam u symbood kongsan hei e kyntien da kitbok kitrwiang u ya ka skur wei e mynsien u ya ki dkhot wow em i yakrehlang heiyatoh wow ye chooh chooh u pyntoh pyntne ya kani ka skur katkam i yah ka juk ka por.
U Kyrmen Shylla won hawa e kyntien, iwa hakhmat, e u i burom wakhroo ya ki bor pait bor pynlai ka Marinhill Higher Secondary School, Jowai kiwa da chimkhia wow pynlaibait lai ryntih ya ki kaam yong kani ka skur na ki por cha ki por kat hadooh wow poi kani ka sngi.
Hawa klam kyrpang heiyatoh wa kani ka Website, ong u kam wa kani ka buit krehkaam yong kani ka por man sakhiat ko i kyrkhu wakhroo ya i ki pateiñ, yooluti leh deini i wai ya kani ka Website, i rukom krehkaam u man chooh chooh iwa rap miat rap bha hapyrdi kiwa sikai, ki khynnah wa ki bei ki pa, wei i naam i pyrtuid ka Marianhill Higher Secondary School, Jowai leh ym kut i du kat ha ki soo kynrooh yong ka chnong Jowai u hær i leh kylleiñ.
Neiliang ka Dakamanbha Ryngkhlem, IT Engineer kam kawa pynwandur wei pyntoh pyntne ya kani ka Website, hapyrdi kiwa wan sakhi chim ko leh wow batai khanna malum mala chaphang ki sarin wa em hapoh ka Website yong ka Marianhill Higher Secondary School, Jowai.
