Ka sorkar jylla da sdang ko u lilam namo da sdang ko ya ka e-Auctioning yong u mooyong uwa dadep tih katkam ka hukum yong ka National Green Tribunal (NGT) heiwa ka Committee ka NGT da chah ko wow lilam chibhah chisien hadooh 2 lakh Metric Tonne (MT) u mooyong na uwa 32 lak Metric Tonne.
Hawa yaklam wa kiwa pathai khubor, u montri rangbah ka jylla, u Conrad K. Sangma ynne da ong u wa chipor da em i sñiawkia na ka NGT neibhah wa da kwah ko wa ka sorkar u kit ko ya uni u mooyong na ki thaw tih cha ki Depot.
Da ong u wa chwa ini neiliang ka sorkar da tyrwa ko wow chah ya ki tre mooyong wow kit ya uni u mooyong cha ki Depot neibhah daw chem chitom ka sorkar wow leh yeini tangwa ka NGT ym pdiang ko yeini kamtæ ka sorkar da kwah noh ko ya kiwa chalan wow kit ya uni u mooyong.
U Conrad da ong u wa hawa sdang heipor wa khut ya ka Tender yow yoh ya ki wow kit ya u mooyong ym em wa wan chakhmat.
Chooh chooh da pyntip u wa ka sorkar da phah noh ko ya ki Deputy Commissioner wow khut Tender ha jar jiar ki District heiwa da em kiwa wan chakhmat (Local bidder) ha ki ar tylli ki District.
Da kyrmen u leh wa neini i kaam daw man i iwa lai bait, wei kam ini i jia ym toh iwa da pyrkhat wow jia tangwa hap hi wow bood yaki kyndon ka aiñ.
