Jowai: Ka Hynniewtrep Border Dispute Redressal Forum (HBDRF) lyngba u Chairman yong ka u Chandame Sungoh wa u Damechwa Syrti Finance Secretary da lai yachem ki wa u CEM yong ka JHADC u Thombor Shiwat haka 24 tarik hei emlang u Dy. CEM u Lasky Rymbai, u E.M. In-charge yong ka Trade u W.G. Sungoh wa u MDC ka Barato-Mukroh Constituency u Aiborlang Shadap.
Hei lai yachem yong ka seiñ khana ko wa da booh yei kylli haka Council lyngba ka RTI kawa da jubab deiwa thylli kawa da e ko cha ka seiñ haka 3 tarik u February 2020, wei ki yutip kiwa ka Forum da paan ko naka Council toh hajrong ka Geographical Map yong ki thaw wa hap hapoh ka Council, ki Map yong ki Elaka ki Raij wa ki chnong wa haap hapoh Council, ki chnong kiwa haap hapyrdi i kajia pood wa ka Assam, ki pyrtuid yong ki Elaka wa ki Dolloi kiwa haap haki thaw kajia pood wa ka Assam, ki yutip heiyatoh wa ka Elaka Nongjrong, Labang, Nangphyllut kawa da chah pyndam haki Karbi, ki Patta, ki Land Holding, ki Land Records yong ki paaid wa chong chnong kiwa em haki thaw khajia pood kamjooh i yaklam hapyrdi ka Jaiñtia Hills Autonomous District Council wa ka Karbi Anglong Autonomous Council heiyatoh wa u pood u ang.
Heiyatoh wa i jubab wa thylli hajrong kitai ki 7 tylli ki phang paan yutip, neiliang ka seiñ khana ko wa da kylli leh ya kitai kiwa yahkhmat ka Council wa toh hi mo ka Council wym em sakhiat ko ya kini ki yutip namo wa yoobeiñ ki yaka Furom wym e ki yei yutip, da ong wa u CEM wa u Dy. CEM jubab ki wa wym em i thoh næ ki Record wa biang neitæ i daw ka Council wym ye ko u e jubab haka RTI.
Chooh chooh ka seiñ khana ko hawa kylli won, wa ileh la kat kitu ki snem waka Council da lai luti ko leh wym em ko ya kini ki yutip næ ki thoh wa emkaam, da jubab ki wa ini toh neiwa leh stiñ ki MDC waki CEM haki por wada lai.
Hajrong ini i jubab, ka seiñ khana ko wa da pynrap won ki deiwa kylli, phi kiwa em katni won iyi leh phi? Neiliang ki MDC khana ki wa da hukum ki ya waroh ki Dolloi wow pynbiang ki yaki Map, ki pyrtuid chnong, ki pyrtuid Waheh Chnong yong ki wei lyngba yong kini u ye wow lum yutip næ lum yukheiñ neibynta u pyntoh pyntne yaki Record waroh.
Kamtæ hajrong ini ka Forum pynsñiaw ko i sñiawsih wei sñiaw lyngngoh wa kammon ka Council wym em ko yaka Map wei wym em ko yei thoh næ Records wot yow pood wa synchaar ko namo ka Jurisdiction Area yong ka, ini pynyoo wa ka JHADC wym em krehkaam ko iyi iyi leh neibynta u pood u ang i khyndaw i chyiap ka ri wa ka jaitbru, im sngi ki du hei baamsap, i ya kylliang Party wei yaknieh chuki, da pynbaad ka HBDRF.
Ka HBDRF ong ko wa neiliang yong ka Council da paan ko yei yakreh lang waka Forum neibynta u pynyoh yaki yutip wa i thoh i taar heiyatoh waka Elaka Nongjrong, Labang, Nangphyllut wa Pangam Raliang (Block-1) kamjooh wa ki thaw ya kajia pood wa ka Assam, wei neiliang ka Forum leh kular ko wow yakrehlang.
