Ka seiñ All Jaiñtia Muster Roll Workers & Labour Union, seiñbei Jowai, da pynman ko ya ka yalang ha ka 10 tarik uni u bnai ha yung dorbar chnong ka chnong Sohmynting, West Jaiñtia Hills District, heiyatoh wa ka phang i myntoi u yoh ki wakreh mylla sngi nadooh kiwa chna yung khyndaw bilat næ kiwa kreh mistri, kiwa tih moo wa kiwa tyndang mooria kiwa da e da ka Meghalaya Building and Other Construction Workers Welfare Board ka chnat ka Labour ka sorkar Meghalaya, kamjooh ya ka baibaam tymmen na ka Prime Minister-SYM yong ka sorkar India ya kitu ki wakreh mylla sngi kiwa em nadooh 18-40 snem i rta.
Ha kani ka yalang da wan ya chimbynta chiboon ngut ki wakreh mylla sngi kam kiwa chna yung khyndaw bilat, ki wakreh dei tih moo, kiwa choh mooria wa ki wakreh Muster Roll ha ka chnat PHE, PWD ka sorkar Meghalaya wa ki MDM Cook wa kiwa chong chnong ka dorbar chnong Sohmynting.
Ya ka yalang da pynlai da u Jerry Suting, heiwa da yoh yei klam na u K.L. Pariat President AJMWLU seiñbei wa na u H. Lyngdoh uwa pynlai ya ka CSC næ ka Digital Seva ha Sohmynting kiwa da batai pynsñiawthooh deiwa rap bniah bha heiyatoh wa i yoh myntoi ki wakreh Muster Roll ka PWD/PHE, ki wakreh mistri khyndaw bilat, kiwa tyndang mooria, kiwa tih moo kiwa da man dkhot ha ka MBOCWB wa ka PM-SYM.
Ha kani ka yalang da em ki wakreh mylla sngi kiwa da im-ja deiwa kreh mylla nadooh ar snem hadooh arphaw snem tam kam kiwa chna yung khyndaw bilat ha Jowai wa ha kiwi ki chnong ha ri-loom Jaiñtia wa cha Shillong, tangwa iwa pynsñiaw diaw ware ya ka seiñ wa boon ym jooh tip ki næ wym jooh sñiaw ki wa ka sorkar jylla e yarap ko ya ki lada mynsoo næ khlaad ki heipor wa kreh ki næ ka bai baam tymmen manda poi u snem chongngiah noh ki næ i e yarap ya ki khon wa dang lai puræ yong ki wa kiwi kiwi tawan i e yarap lada man dkhot ha kani ka MBOCWB.
Ha kani ka yalang, ka seiñ All Jaiñtia Muster Roll Workers & Labour Union, da seiñ ko ya ka chnat krehkaam ka yong ka ha Sohmynting heiwa da jied ya u Jerry Suting kam u President, u Ïaraplangki Pyrtuh Vice-President, u Lambokstar Ryngkhlem General Secretary, ka Thywill Be Done Suting Asstt. Genl Secretary, ka Pdianghun Ryngkhlem Treasurer wa kamwa chiphaw ngut kam ki dkhot ka Executive Committee ka chnat Sohmynting kiwa da pynskem da u K.L. Pariat.
Neiliang ka seiñ AJMWLU da kyntu joor ko ya waroh kitu kiwa im-ja nei khih mylla kiwa em khon kiwa dang lai puræ wow pynpsiah pyrtuid ki ha ka PM-SYM yow yoh baibaam man-u-bnai manda tymmen mynda poi u snem wow chongngiah noh na i kaam wow sñiawbha u chimkhia u lai pynpsiah dkhot yow yoh yarap leh na ka MBOCWB ka chnat Labour ka sorkar Meghalaya, deiwa lai takit na kiwa krehkaam ha Labour kawa em ha Ladthadlaboh næ ye ki leh u yachem ya kiwa krehkaam ka seiñ AJMWLU yow yoh yarap kamjooh ya kiwa em ha ki C&RD ha West wa East Jaiñtia Hills District.
Ha kani ka yalang da yoh leh yei klam naka M. Bareh ka General Secretary, ka L. Kyndiah ka Treasurer wa na u D. Suchiang u dkhot ka seiñbei.
