Mih biang i kajia pood ka Mizoram-Assam hadien wa tympra ki sahep sorkar ka Karimganj ya iwi i trep

I kajia pood hapyrdi ka Assam waka Mizoram da mih biang i hadien wa ki bru sorkar ka Assam kiwa na Karimganj District da tympra ki ya iwi i yung trep kamjooh i thaw rep iwa em ha i thaw wa da kam da waroh arliang.

Ka sorkar Mizoram da kam ko wa ki bor District na Assam, ki pulit wa ki sahep ka chnat Forest na Karimganj da psiah ki cha ka Mamit District ka Mizoram wei da thang ki ya iwi i ”Farm House” wei da pynsih ki leh ya 1,000 tylli ki tre dieñ kwai ha chnong Thinghlun haka janmiet ka 9 tarik.

U Karimganj Additional Superintendent of Police u Jyoti Ranjan Nath, da ong u wa ki sahep ka Assam da tympra ki ya iwi i yung trep wa kattu katni ki mar rep tangwa ym em tba ki yaki dieñ kwai ha Choto Bubir Bandh i thaw wa ong u toh wa em ha Assam iwa da toor pood kiwa chong chnong ka Mizoram.

Ini i jia da pynchrai ko yaki bru ha Mizoram heiwa da e FIR haka Kahnmun Police Station pyrchah yaki sahep ka Assam heiwa u DGP ka Mizoram u SBK Singh da yaklam u wa u heh sorkar na Assam u Bhaskar Jyoti Mahanta ya ini wa jia.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ka sorkar Mizoram da ong ko leh wa daw thoh ko chaphang ini cha ka Union Home Ministry kamjooh cha ka Assam ya ini wa jia.

Ka seiñ Mizo Zirlai Pawl (MZP) haka 10 tarik da pynman yalang ko wei da rai wow chna biang ya ini i yung trep wei daw e yarap poisa leh, da pyntip u President ka seiñ u B. Vanlaltana.

Nadooh u snem 1995 da pynman ya kiwa boon ki yaklam yow pynbait pood hapyrdi kini ki ar jylla tangwa hadooh katni ym pu ye u pynbiat.

Ka Kolasib, Aizawl waka Mamit District da em ki ya u pood wa jrong 123 km waka Cachar, Hailakandi wa Karimganj District ka Assam.

Ha chwa ini da em i kynaad ha thaaiñ Zophai hajan i chnong Bairabi ha Kolasib District ka Mizoram ha u March, 2018 heiwa ki dkhot ka MZP da pyrchang ki wow chna biang ya kawi ka thaw chong ngiah (Resting Shed) iwa da tympra da ki bor District ka Hailakandi, Assam. Palat 60 ngut da mynsoo ha ini hadien wa dat lathi wei da siat ki pulit ka Assam.

Da wanrah yei jai jai hadien waka sorkar pyrdi da phah ko yaki ar jylla wow yasuk ki hadooh wa ye wow pynbait ya kani ka kaam.