Ka Mawsmai-Nongthymmai Elaka ynne ka sngi da pynbna ko wa da chah ya kiwa wan uiñke suwari kiwa na ka jylla wow lai paitke ki yaki thaw wa miat yong kani ka chnong nadooh ka 16 tarik uni u bnai.
Ka Mawsmai toh ka thaw wa em ka kchaaid Nohsngithiang wa pawnaam, ka Krem Pubon wa miat, ka Thangkharang Park, Eco Park wa ka thaw uiñke pynngad wa da wai thymme ya kawa da tip kam ka Kchaaid Khmat Kharai næ ka Double Drive.
Ya ini i rai wow wai yaki thaw uiñke da chim hadien i pynbna da ka sorkar jylla wow wai noh ya waroh ki thaw uiñke ha ka jylla nadooh ka 16 tarik uni u bnai deilang wa i bood ryntih ya ki kyndon wei wym toh u ya chlong khynnia du ha chi thaw.
Ka Mawsmai-Nongthymmai Elaka da kyntu ko leh ya kiwa wanke na ka jylla wow bood ryntih wei ym toh wow ya lumlang ha i jooh i thaw, wei wow ksoh ya ka akor burom, khamtam dooh wym toh u noh taroi yaki klong næ Plastic ha kini ki thaw uiñke.
Da pynbna leh wa da chah wow wai ki thaw sah kiwa em hapoh ka chnong kam ki Hotel wa Guest House ha kini ki thaw nadooh katai ka sngi khnang wa kiwa wanke u ye ki wow sah.
