Kawi ka men kawa 80 snem i rta da jop ko ya u khñiang COVID-19 nalor wa em ko ya kiwi ki kjut ki chitom wei da yoh ko wow mih na thaw sumaar ka Bethany Hospital, Shillong ynne ka sngi.
Kani ka men toh kawa da li booh Hospital haka 5 tarik uni u bnai neidaw wa iñdoh, wa em ko ya i ka-oh, wa chitom ko wow riñ mynsien wa kiwi kiwi de. Man ko leh kawa duna yei em Oxygen hei snam yong ka, kawa da Test wei da chem toh kawa yoh COVID-19 wei da em ki dak wa yoh Covid Pneumonia hadien wa leh yaka Scanning.
Kiwi ki chitom wa da em chwa ko toh kam i Diabetes wa Hypertension wei da sumaar yaka deiwa e Oxygen 7 sngi wa kiwi kiwi ki sumaar hadooh wa da Test wei da chem wa ym em de ko ya u COVID-19 haka sngi wa 10.
U Dr. Kyntiewlang Sanmiet, uwa e ktien ka Bethany Hospital da ong u wa ini toh iwa pynkynmoo wa kitu kiwa em chwa ya kiwi ki chitom lada em ki ha iwon iwon i rta leh ye wow pynchait ya ki lada yoh ki yei sumaar smat. Kamtæ da ong u wa i chem smat yei yoh ya uni u khñiang yow e yei sumaar toh iwa emkaam bha ya kiwa yoh COVID-19.
