Shillong: Ka sorkar jylla ynne ka sngi da rai ko wow phah takit noh da ka kynhun ki stat (Expert) yow thooh bniah ya ka thaaiñ Nongbah Jynrin-Domiasiat, hadien wa da pynbaad da kiwa boon ki kynhun wa em i lait ka la-ær bih na ki top wa pynlang ya ki jhep Uranium.
U symbood montri rangbah ka jylla, u Prestone Tynsong da ong u wa ka sorkar ynne ka sngi da chim ko ya kani ka rai hadien wa da mih ki pynbaad wa em i lait ka la-ær bih Uranium na ki top wa pynlang ya ki jhep. Da ong u wa ini i rai yong ka sorkar wow booh da ka kynhun ki stat wow thooh bniah toh yow lai bichaar ya katai ka thaaiñ, wei lada chem wa em sakhiat kattæ ka la-ær bih kawa mih na katai ka thaaiñ daw e yumut kini ya ka sorkar kammon wow leh khnang wow lait na kiwon kiwon ki maa.
Da pyntip wa neibynta ini i kaam da e kti cha u Chief Secretary ka jylla wow phah ya kani ka kynhun wow lai thooh bniah.
U Prestone da ong u wa ka sorkar ha iwa nyngkong da phah ko wow takit wei wow paan kaiphot leh na ki bor pynlai District wa kynthup na ka Deputy Commissioner wa u Superintendent of Police, tangwa neidaw wa ki bor District ym toh kiwa ym tip bha ha katai ka liang, ka sorkar da chim ko ya ka rai wow thung da kiwa stat wow thooh bniah.
