Shillong: U Prestone Tynsong uwa man leh u symbood montri rangbah ka jylla da khyrwiat u yaka Bharatiya Janata Party (BJP) Meghalaya, kawa men leh ka Party wa emlang hapoh ka sorkar Meghalaya Democratic Alliance (MDA) deiwa ong wa lada ym hun ko, ye ko wow mih noh na ka sorkar.
U Tynsong da ban biang u deiwa ong, ka BJP lada ym hun ko wow em ha ka sorkar, man ko kawa laitlooid wow mih noh, neibhah ym ye du wow pynbaad katwa ngait ya ka sorkar, tangwa ha i jooh i por won kwah ko wow em næ ya krehlang wa ka sorkar MDA wei i dawa wow thung takit CBI ha kut ki kam toh kawa ym ye wow man.
Da ong u wa ka sorkar ym kwah ko wow murieh iyi iyi neibhah wa nadooh wa sdang wow chna yaka sorkar synrop MDA, i thmu man bait ko wow pyrchah ya kiwon kiwon ki kaam pyrchah yaka aiñ, deiwa pynrap leh wa ka MDA ka em ko yaka Co-ordination Committee ha kawa u President wa uwi u MLA toh ki dkhot, heiwa da kylli u wa ileh wa ka BJP ym rah ko cha ka Committee hawa chem ko ya kiwon kiwon ki bakla.
U Prestone da ong u wa ka sorkar ym em leh thlah ko hajrong ki kaam pyrchah yaka aiñ, wei i pynbaad yong ka BJP toh kiwa khia bha neibynta ka sorkar neibhah ki pynbaad toh du deiwa yoo ha ki laad pathai khubor khlem em ki pynsakhiat lyngba ki kot ki sla.
Hawa yatoh wa i pynbaad wa em i baamtooh ha ki ar tylli ki District Council (JHADC/GHADC), u Prestone da ong u wa ka sorkar da thung ko ya ka kynhun takit bniah ya i kheiñ i diah næ ka ‘Team of Audit’ wa da khlieh da ka Directorate of Accounts and Treasuries wei kani ka Committee daw pynsakhiat ko ya waroh ki pynbaad wa da mih na ka BJP.
Ha i jooh i por u Prestone da ong u wa lada em iwon iwon i chem ya i bakla næ pynbaad, ye ki wow rah cha ka sorkar deilang wa ki kot ki sla wei ka dwar yong ka sorkar wai ko waroh 24 kynta.
