Thoh u Sanbor cha u President ka BJP yow dam u pynbaad yaka sorkar khlem biang sabut

U MLA ka BJP u Sanbor Shullai da thoh u cha u State President ka BJP u Ernest Mawrie wow dam chwa yei pynbaad ha ki laad pathai khubor yaka sorkar MDA ka Meghalaya deiwa burom ya i rai wow yaklam chwa wei pyntip chwa ya ki 2 ngut ki MLA ka BJP chwa wow pynmih ya kiwon kiwon ki khubor wa man pyrchah yaka sorkar.

Haka chithi u Sanbor da ong wa ini i pteiñ wow pynmih yaki khubor pyrchah yaka sorkar da kiwa ksoh kaam ka BJP da pynsih ko yei dur ka BJP deiwa pynkynmoo wa yaka MDA da seiñ deiwa chimkhia kiwa yahkhmat ka BJP ka seiñbei heiwa deiwa ya krehlang wa kiwi, ka BJP leh da emlang ko ha kani ka sorkar kawa da em leh ka NPP waka UDP kiwa man leh kam chibynta ka North East Democratic Alliance (NEDA).

Da ong u wa deiwa pteiñ ma pteiñ wow pynmih khubor daw booh ko leh yei kylli ya ki rai yong ki heh ka Party nadooh wa sdang kani ka sorkar synrop hanla da pyrchang ma pyrchang kiwi kiwa emlang ha kani ka sorkar synrop wow pynbait ya ini lyngba ki Coordination Committee kawa da kynthup lang ya waroh ki Party kiwa em haka MDA tangwa i pynbaad da pteiñ bait i khlem da biang ki sabut.

Kamtæ da kyntu u leh ya kiwa yahkhmat ka Party wow wanrah ki ya waroh ki kaam wa yatoh waka ha ka rynsan wa da booh wei ym toh wow pynbna paidbah yow yoh laad chwa u pynche wei kam kawi na ki lok ka sorkar u kynthah ma kynthah yaka sorkar leh daw booh ko yei kylli iyi i daw wa da emlang ha kani ka sorkar.

Related posts

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Chooh chooh da ong u wa u Montri Rangbah ka jylla uwa man leh u Chairman ka sorkar synrop toh uwa kyrchaan yaka BJP ha kini ki 2 snem chiteiñ nadooh kitu ki por wa em boon kiwa pyrchah yaka BJP hapoh Meghalaya.

Heiyatoh won wow pynkut noh yei kyrchaan yaka sorkar, da ong u wa i rai wow kyrchaan nadooh wa sdang da wan ko na khlieh dooh wei u maham maham u mih noh naka sorkar da pynsihdur ko yaka sorkar kamjooh leh yaka yurim wa yieñ ka Party.

Kamtæ da kyntu ya u State President wow burom yaka rai wa da chim haka 2 tarik uni u bnai wa chwa wow pynmih khubor wow pyntip chwa cha ki ar ngut ki MLA ka Party wei wow dam noh u pynmih ma pynmih khubor ya i jooh chi i jooh.