Khliehriat: Ka East Jaiñtia National Council (EJNC) Sumer Circle da li sylli ko ya u sarok wada chah ieh khonswet daki phaw snem kattu heiwa u tai u sarok toh uwa haap haki soo tylli ki chnong ka chnong Pala, Muknor, Khahnar wa Kseh.
Ha ini i lai pait ya kani ka sarok, da yahkhmat da u President yong ka Sumer Circle u Sakilan Chyrmang deiwa synrang lang u President ka seiñbei ka EJNC u Sambormi Lyngdoh waki dkhot yong ka hei emlang u Chairman ka Elaka Sumer u Matheus Dkhar, wa ki waheh chnong yong kitai ki soo chnong u Lokas Pakem waheh chnong ka Muknor, u Shemphang Pakem waheh chnong ka Pala, u Fulness Manar waheh chnong ka Kseh wa u Liyo Pasleiñ waheh chnong Khahnar.
U Sakilan Chyrmang hawa klam u wa kiwa thoh khubor da pynsñiaw u ya i sñiaw diaw hadooh kattæ kattæ yei wym pait ka sorkar yaki thaaiñ nongkyndong khamtam ya katai ka thaaiñ soo chnong daki phaw tylli ki snem kiwa da chah ieh sahdien, da booh u leh ya i kyrpaad naka sorkar wow chna noh ko ya u tai u sarok khamtam ya u MLA kani ka thaaiñ wa ymtoh u yoo beiñ ki ya ka thaw nongkyndong, neibhah ki nongkyndong leh toh ki paradoh para snam yong i hi, wei kitai ki soo chnong da dooh ki leh chiboon ki myntoi neidaw yong u sarok hadooh wa ki mar rep yong ki leh ym ye de ki u pynpoi cha yaw Ladrymbai, yaw Khliehriat neidaw u sarok, da ong chooh chooh u wa lada ka sorkar smat ko u pynyoh ya u sarok wa emkaam, daw pynyoh lang ko ya ki myntoi wa boon jait.
U President ka seiñbei ka EJNC da beiñ joor u yaka sorkar MDA hadooh ka sorkar warim neidaw wa ym yoo ym chynna ki yei eh yong kitai ki soo chnong, da ong u leh ka surok toh u man ko u thied snam yong u paidbah, khlem u sarok chiboon i eh maad ki paidbad chong chnong la haka lai ka wan næ i kjut i chitom la ha i roi i paar wa boon jait, da ong u leh wa ini i wym chimkhia ka sorkar jylla, ka sorkar Assam da jooh yoh ko wow kaam ya u pood u ang yong ka jylla Meghalaya neidaw wa ka sorkar ym jooh theh ko ya ki kaam pynroi cha ki thaaiñ khappood næ thaaiñ nongkyndong, deiwa pynrap wa neiliang ka seiñ daw lai booh ko da i thoh cha u Sniawbhalang Dhar wei lada ka sorkar ym chimkhia ko yeini, ka seiñ deilang wa kitai ki soo chnong u pynman noh ki daka yakhih kawa joor wow dawa ya i hok yong ki.
U Chairman ka Elaka Sumer u Matheus Dkhar da ong u leh wa da em i jia wa sñiawsih haki por wa dadep neidaw wa sih u sarok wym ye de ki u pynpoi yaki wakjut cha Hospital kawa jaan dooh toh kawa em ha Khliehriat wei da hap leh wow li booh cha Jowai wei yaki bru wa kjut da hap wow kit da ka Bolero Pickup kawa lait wow lai ha katai ka sarok wei ka bai kari leh da poi T. 2000 chaneiñ, da ong u leh lada ka sorkar ym pynyoh sarok ko ya ki ha kani ka kajiak sngi wow wan, kam kiwa chong chnong yong ki soo chnong da rai ki wow dam noh u thap Vote Election haka 2023 wei da rai i leh u yasoh noh waka sorkar Assam.
