Shillong: Ka United Democratic Party (UDP) ha ka yalang yong ka Central Executive Committee (CEC) da rai ko wow booddien biang ya ki phang neibynta i miat i bha yong ka jylla, wei kini toh ki phang wa ka UDP da yatai sani bha ko wa kynthup ya i pynbait noh ya u pood u ang, wow wanrah ya ka rel kit mar du hadooh Byrnihat, wow yoh noh ya i tipmit ya ka ktien Khasi wa Garo ha ka Eight Schedule yong ka riti synchaar wei wow pynkrehkaam ya ka Inner Line Permit (ILP) wei kamjooh wow pynyinsur yaka rta yaleh kreh hapoh ka jylla.
Hawa klam hadien wa wai ka yalang, u President ka UDP, u Metbah Lyngdoh da ong u wa da toh i por wa ka sorkar jylla wow pyrkhat thymme noh wow pynyinsur yei rta thap kaam na ka 32 snem cha ka 37 snem, neibhah kamwa man kattæ em boon ki khynroo wa chong khlem kaam neidaw wa ym em por de, deiwa pyntip wa hadooh katni du ka chnat puræ puthi kawa da leh ya ini, wei neiliang ka UDP kwah ko wa ka sorkar u pynkrehkaam ko ya ini i jooh ha kiwi ki chnat sorkar.
Hawa yatoh waka luti rel, ka UDP da klam che ko wa pyrchah wow pynpoi ya ka luti rel chadooh Shillong, deiwa pynsñiaw wa ka Party ka kyrchaan ko ya ka luti rel du hadooh Byrnihat, Ri Bhoi District wei du yaka rel kit mar ym toh ya ka rel kit bru.
Hawa yatoh waka Eighth Schedule yow tipmit noh ya ka ktien Khasi wa Garo, neibhah ka Meghalaya Assembly da dep ko wow mynjur leh ya ka Resolution ha u snem wa da dep, u Metbah da pyntip u wa ka UDP hadooh kattæ ya kani ka kaam dang booddien wow tip ya ka luti lai, wei hadooh katni dang booddien ko wa u Montri Rangbah wow yakhun wow yoh noh ya ini i dawa. Da ong u wa ini i phang toh i yong ka sorkar pyrdi wei i kaam na ka jylla toh wow booddien wow pyntikna wa ka sorkar India u e ko yei tipmit.
Ha iwi won i liang u President ka UDP da ong u wa ka UDP daw pynkynmoo biang ko ya ka sorkar jylla, deiwa phah biang ya i thoh kammon lai i kaam wa yatoh wa ini, kamjooh ki phang kiwa ka Party da rah neibynta ka jylla.
