Ka Khasi Student Union Jaiñtia Hills District Unit da yoh ko wow pynyar yaka chnat krehkaam yong ka haka yalang wa pynman ha Jowai wei ya kani ka chnat krehkaam da tip kam ka KSU Jowai Unit.
Ya kani ka chnat krehkaam wa thymme da pynsmai da u Ostarnic Marbaniang, Organising Secretary ka KSU seiñbei, katwa yaka yalang da pynlai da u Morning Pasi, President ka KSU Jowai Circle.
Ha kani ka sngi da ya emlang leh kiwa yahkhmat ka KSU Jaiñtia Hills District Unit wa kynthup ya u SS Niangti, u Shaniahshkem Dkhar, u Kwilness Suchiang, u Conard R Sana, u Cherity Suja, u Vice President ka KSU Delhi Unit u Wallam Nongsiej wa kiwi kiwi won ki dkhot ka KSU.
U SS Niangti hawa e yei klam haka yalang da ong u wa i khlan ka seiñ wa i em ki chnat krehkaam yong ka ha kylleiñ ka Bri U Hynniewtrep da pynyatylli ko yaka jaitbru wei daw pyndooh ko leh yei sñiaw yaphær thaaiñ.
Katwa u Ostarnic da ong u wa ka KSU ym toh du kam ka stieh yada, tangwa man ko kam ka waitlam wow mait ya kiwa choon kiwa thmu wow tympiah tympra yaka jaitbru.
Ha chwa wow pynkut yaka yalang da yoh leh ya i klam na u Ewanmi Phawa, President wa thymme ka KSU Jowai Unit.
