Da u Chandame Sungoh
Nga ymtoh u bru u wa nang wa stat,
Uwa yaar hei thij wei pyrkhat;
U ksaaid O kam u tkhu wa pær ha um,
Lait i sap O’u sah du hapoh tnoom.
Man O u khon lymboit lymbiang,
U kup chiliang u sem chiliang;
U rynjit rynjiaw, u puhtoh puhnai,
U wym tip wym bna ka pyrthai.
Yow lait ki khon tang u yap ja,
Kat chawa yoh yaleh O’u khih mylla;
Wym em i sarom wym em i swe,
Lait O tang nei tooh nei lute.
Hanlada ha pyrdi i dooh i thngan,
U ieh ya ka imlang sahlang wym man;
Yong wada e u Blai kam ini i mynsien,
U tia chaphang, wym ran chadien.
Ya idæ chwa u pyndap pynbiang,
Tæ pait won ya ka imlang sahlang;
Boi tæ chi”rta wym mahajon ,
Tæ ympoi thaw cheiwon cheiwon.
Khih sy’a i mynsien O kam ki kynthai sooh kha,
Wow yoh noh yow pood u ang wa pura;
Nadooh na Block-1 chadooh cha Langpih,
Khyndaw i chyiap lait u chah knieh.
Pyrkhat, mutdur O chawa thiah wa chong,
Kat mynnu ma-ai u poi cha ka thong?
U yasaaid ya phliang waka bei India,
U pood u ang wow bait noh lura.
Yeini i kaamram haap leh haap pyndep,
Wym hoi u kitram O cha loom tlep-bru,
Lada yeini ye O’u pyntikna,
U mot sahnaam tæ da pynyieiñ chwa.
