Hadien wa yoh yutip wa ye wow wan pyndem u Dristi Rajkowa, Deputy Commander ka ULFA(I), ki pulit ka East Garo Hills District da booh ki yaki thaw wow pynsangeh kari ha kiwa boon ki thaw u sarok-bah NH 62 ynne ka 11 tarik.
Heipor kamwa 6 waje i miet da yoh yutip wa em artylli ki kari kiwa lai lyngba ka Nongal Police Station deiwa rap phær. Kamtæ u OC wa u IC ka Rongjeng Nengkra wa Dobu da pyntip cha ki ya ini kiwa da booddien wei heipor kamwa 6:30 i miet, ki pulit wa em ha Nengkra da pynsangeh ki ya artylli ki ki kari wa em ya u Number AS-01AK-9102 wa AS-01EA-4659.
Heiwa da pyntikna wa ki bru wa em hapoh kari toh u Yashin Ali (25 snem) uwa tip leh kam u Axom uwa na Lakhipur, u Rup Jyoti Rabha (25 snem) uwa tip leh kam u Lombu uwa naka chnong Beldongpara Krisnai, Assam, u Babul Rabha (22 snem) uwa naka chnong Chotamati Goalpara, Assam, u Dristi Rajkowa (50 snem) uwa tip leh kam u Bura Dada uwa na Belpara, Assam wa u Rahul Hazarika (27 snem) uwa tip leh kam u Laden uwa na Moran Distict, Dibrugarh Assam kiwa waroh toh ki dkhot ka ULFA.
Ki pulit da pyntikna ki na u Dristi Rajkowa, Deputy Commander ka ULFA (I) uwa da khana wa da lait ki na i ya tyngkhooh waki pulit ha Bolbokgre ha South Garo Hills heiwa da thmu ki wow kaap na Gaobari cha Bangladesh. Tangwa neidaw wa joor wa chah kdong ki ha Bangladesh da yut ki wei da kynjoh ktien ki yaki heh ka Army yow pyndem ha Dilsengre, South Garo hills.
Na kini da yoh kem ya kawi ka suloi AK-81, artylli ki 9mm Pistol, 90 tylli ki kuli AK-81, 9 tylli ki kuli 9mm wa 8 tylli ki kuli .32mm.
Ha kawi tawon ka khubor, ki pulit ka South Garo Hills da chem ki ya le tylli ki synduk wa rap heh na iwi i khloo haka 10 tarik uni u bnai. Waroh da chem 1260 tylli ki kuli kiwa em 420 tylli ha kawi ka synduk. Kini ki kuli toh kiwa da suba wa murieh da ki dkhot ka GNLA.
