Shillong: U Symbood Montri Rangbah ka jylla uwa pait leh ya ka chnat PWD (Roads), u Prestone Tynsong ynne ka sngi da pyntip u wa ka sorkar daw sdang noh ko wow chna ya ka yingkieñ naar ha ka sarok Shillong Bypass wow yarap chipor ya ki kari wow lai ki na kani ka sarok wei yeini da jubab u yeiwa kylli u MLA ka Congress na Umroi, u George B. Lyngdoh, uwa da pynsñiaw yei sih ka yingkieñ Dwar Ksuid kawa em ha sarok Shillong Bypass.
U Tynsong da pyntip u leh wa hajrong ini i thmu dadep yaklam leh wa ka Ministry of Roads and Highways kamjooh wa NHAI ha New Delhi wei mar pdiang ko yeini, ka sorkar daw chna noh ko ya kani ka yingkieñ.
Heijooh i por u Tynsong da ong u wa ki truck kiwa jooh lai na Shillong Bypass, katni chipor da lai lyngba ki na sor Shillong heiwa da booh por wow lai ki nadooh 9:00 i miet hadooh 6:00 i step.
Heiyatoh won wa ka yingkieñ Umiam wa da sdang oor ko neidaw wa da rim ko, u Tynsong da ong u wa kani ka yingkieñ u neh ko hadooh palat 50 snem, deiwa pynrap leh wa lyngba ki stat chemphang ka MeECL, ki truck kiwa ye u lai lyngba kani ka yingkieñ toh du hapoh 40 MT i khia.
