T. 20 lak chi snem yoh ka KHADC na ki khyrdop katwa kiwa khrong chim ki T. 1000 ka wi ka truck

Shillong: Ka Executive Committee ka Khasi Hills Autonomous District Council (KHADC) da maham ko ya kiwon kiwon kiwa pynlai ya ki khyrdop wow khrong dan ki pyrchah yaka aiñ, palat ya i dor wa da booh, wei lada chem wa em kiwa tyngkheiñ ya ki kyndon u pynchitom da iwa eh wot hadooh wow phah khang syndon ya ka khyrdop.

Hawa klam ynne ka sngi wa ki laad pathai khubor hadien wa wai ka yalang wa pynman jhan, u Chief Executive Member ka KHADC, u  Titosstarwell Chyne da pyntip u wa ka Council da yoh yutip ko wa ki khyrdop lum dan wa da e wai da pynkheiñ ki ya ki kyndon deiwa khrong palat pood na ki kari kit mar, deiwa pyntip leh wa ka Executive Committee phah ko ya ki Executive Member wa toh u pait wei wow khut ya waroh kiwa chim wai, hei wow phah wa toh u bood bait ya ki kyndon wa i dor du yaki mar kamwa da booh da ka Council.

Ha i jooh i por da pyntip u wa ka Executive Member wa pait ya ka chnat Forest ka KHADC, daw phah ko wa toh u khynra lut ya ki truk wa kit dieñ na ki khloo ka Council, wow pyntikna wa ki toh u em ki yaki Transit Pass, deiwa pynrap leh wa ka KHADC ym kwah ko wa ki wakreh u lum poisa ki pyrchah yaka aiñ, wei da maham leh wa lada chem ya kam kitai ki wakreh daw pynchitom da iwa eh, wot hadooh wow pynsangeh chipor ya i kaam.

Hawa kylli, u CEM da pyntip u wa hadooh katni ym pu em iwon iwon i ujor, tangwa da yoo yei pynbaad du ha ki laad pathai khubor, wei ka Council da sñiawkhia ko yeini wei da chim ya ini i ka rai wa kam kini ki pynbaad ym toh u mih de ki ha ki por wow wan neibhah wym sñiawmiat.

Related posts

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

U Titos da pyntip u wa katkam i pynbaad wa da mih, da em i lum pyrchah yaka aiñ na ki khyrdop hadooh T.1000 kawi ka kari, katwa ka KHADC da yoh ko du kamwa T.20 lak ha chi snem, chooh chooh da pyntip u wa em i pynbaad leh wa da khrong pyrchah yaka aiñ ha ki khyrdop neibhah hanla ki kari da dep ki wow su deiwa pynyoo ya ki slip ha kawi ka khyrdop, tangwa dang hap wow su biang hanla ka dan toh ha u jooh u pood u ang.

Hawa kylli chooh chooh, la ka KHADC u phah takit næ ym em ya kani ka kaam neibhah da wanrah yei dooh nong ya ka Council, u CEM da ong u wa katni da ekti ha ki EM wa toh u pait yow pynbait.