Shillong: Ka Khasi Hills Autonomous District Council (KHADC) da rai ko wow thoh cha ki Bank, cha ka chnat Income Tax wei kamjooh cha kiwi ki chnat wow pynlait yei paan ya ki PAN Card na ki dorbar chnong kiwa lai wow wai ya ki Account neibynta wow kynchew ya ka poisa chnong.
U Chief Executive Member ka KHADC, u Titosstarwell Chyne da ong u wa ka Council da yoh yutip ko wa em ki dorbar chnong kiwa lai wai Account ha ki Bank wei da chah paan wa ki PAN Card, wei ini daw ye ko wow ktah ktah ya i bor kam kiwa synchaar chnong. Da pyntip u wa kiwa yahkhmat chnong kiwa lai wow wai yaleh PAN Card da phah Register ya ki Dorbar Chnong kam ki Society, heiwa da pynrap wa ini ye ko wow man i maa ya ka synchaar khadar.
U CEM da kylli u wa ileh wa emkaam PAN Card ya kiwa synchaar chnong, hawa da thung yaki katkam ki aiñ wa da pynkup bor ha ka Council.
Ha iwi won i liang, ka KHADC ynne ka sngi da rai ko wow su noh ya ka Arrear yong waroh ki wakreh hachwa ka Christmas kamwa 30%.