Shillong: U Chief Executive Member ka Khasi Hills Autonomous District Council (KHADC), u Titosstarwell Chyne da pynsñiaw u yei wym sñiaw yahap hajrong ka Report wa da ekti da ka Parliamentary Standing Committee neibynta wow pynkylla ya ka 6th Schedule. I daw wa pynsñiaw u yei pyrchah toh neidaw wa ka Committee ym em kynthup ko ya iwa e yumut yong ka jylla, wa kynthup na ka sorkar, kiwa yahkhmat chnong wa na ki khlieh wa synchaar wa na ki le tylli ki ADC.
Da pyntip u wa ka Committee da wan ko leh cha nongbah Shillong ha u snem wa da dep neibynta wow paan yumut ya iwa emkaam hachwa wow pynkylla ya ka Sixth Schedule, tangwa hadien wa da yoo yaka Report wa da booh ha ka Website yong ka Parliament da pynsñiawsih neibhah wa ka Committee ym em ap ko yeiwa e yumut yong ka jylla.
Da pyntip u wa hajrong ini, neiliang ka KHADC ha u Naichiphaw da phah ki ya ka chithi cha ka chnat District Council Affairs (DCA) yong ka sorkar jylla wei kamjooh cha ka Ministry of Home Affairs (MHA) ka sorkar India wow pynsñiaw yei pyrchah. Da ong u wa ini wym kynthup ya iwa e yumut yong ki ADC da pynyoo wa ka Committee ym bna ym burom ko ya ki District Council.
Katkam wa pyntip u Titos, kawa nyngkong wa ka Council pyrchah ko toh hajrong i ktien ‘Unrepresented Tribe’ næ wow jied (Nominate) ya ki MDC na ki jaitbru ri-loom ki wym toh ki Khasi, deiwa pynsñiaw wa ini i ktien daw wanrah ko yei kulmar yumut wa i wym sñiawsuk hawa yatoh wa i pynlai ya ka dorbar ha ka Council khamtam hawa yaklam bait da ka Khasi.
Kawi won kawa ka KHADC ka pyrchah ko toh ya ki Village Council wa Municipal Council neibhah wa man ko pyrchah ya ka riti tre ri, heiwa da dawa wa toh u tipmit noh ya ki dorbar chnong da ka riti synchaar ka ri India.
Hawa yatoh won yei pynku yei em ki MDC, da ong u wa ka Council ym yahap ko wow em hadooh 40 ngut ki MDC, tangwa ka PSC ym em ap ko yeiwa e yumut yong ka Council wow em du 37 ngut, kitæ 35 ngut wow jied da ki paidbah wa 2 ngut ki MDC wow thung hi-eh deiwa booh kyrpang ka wi neibynta ki kynthai.
U CEM da dawa u leh wow pynhaap noh ya 3 tylli ki Municipal Area hapoh ka Sixth Schedule, kitæ ka European Ward, Cantonment wa ka Jailroad.
Chooh chooh da ong u wa ka KHADC ka kwah ko wow pyndam ya i ktien ‘President’ ha ka para 12(a)(b) yong ka Sixth Schedule wei wow booh bait da i ktien ‘Governor’, wei ini daw e bor du lyngba u Lat wow kyntait pynkrehkaam ya ki aiñ ka sorkar pyrdi, lane wow pynbait katkam i long i man ka thaw wow pynkrehkaam. Da ong u leh wa i bor yong ka Article 200 yong ka Riti Synchaar toh wow em hapoh ka Sixth Schedule, wow yoh ya i mynjur ya ki Bill na u Lat du haka sien kawa ar wa da phah biang hadien wa da dep wow paan yumut næ pynche.
