Jowai: Ki seiñbhalang wa kynthup yaka KSU, FKJGP, HNYF, RBYF, GSU, AYWO waka ADE ynne ka sngi da pynman ki yei ya chong kyllaiñ myngngor ha kylleiñ ki District ka jylla hajrong ka yurim wow pynkynmoo næ wow pteiñ yei dawa ILP kawa da sdang nadooh ynnin snem haka jylla wa kynthup leh ya kiwi won ki phang dawa.
Ha Jowai yeini i ya chong da pynman ha Iawmusiang wada chimbynta daka seiñ FKJGP waka KSU deilang waki Placard wada thoh yaki phang dawa yong ki.
Hawa yaklam wa u D. Khongsit General Secretary FKJGP Central Body da ong u wa kani ka yakhih nyngkong toh hajrong ka CAA hadien wa ka sorkar India da wanrah ko u pynkrehkaam ya kani ka aiñ deiwa e laad ya kiwa chong chnong na kiwi won ki ri wa marjan wa ka India u wan chong chnong ki, tæ kam ka jylla Meghalaya leh toh kawi wow chah ktah bha ha kani ka bynta, neitæ i daw da pynman yakhih ki wow pyrchah yaka CAA wei dawa leh u pynkrehkaam ILP, tangwa hadien wa wan noh ka khlam da hap ki wow pynsangeh chwa.
“Pynkynmoo biang i yaka sorkar India wa i hi kam ka jylla waroh kawi pyrchah i ya kani ka aiñ CAA wei dawa i leh wow pynyoh smat yaka jylla daka ILP. Ka sorkar India hapyrdi i yakhih ki jylla waphær waphær ka thaaiñ mihsngi da e ILP ko yaka jylla Manipur katwa ya i won leh chiliang ko,” ong u D. Khongsit.
Ong haroh u waka ILP toh kawi ka laad wow yada yaki jaitbru khian paaid haka thaaiñ mihsngi, yeini da pynskem hi daka sorkar India neibhah da yoo wa manda wanrah ko yaka CAA, e wot ko yaka jylla Manipur u pynkrehkaam ko yaka ILP.
Heijooh i por kyntu haroh u yaka jylla wow pynkrehkam noh yaka MRSSA Act 2016 kawa neiliang ka sorkar jylla da dep ko wow mynjur wei sah sa du wow pynkrehkaam, neibhah ini leh toh kawi ka laad yada nei wan ki bru wa na baar. Hanla kattæ leh i dawa ILP u lai hi ko chakhmat.
U Shiningstar Bihkhiew, Assistant Education Secretary KSU Central Body, da pynkynmoo u wa haka 19 tarik Kmaichonglad (Dec) 2019 neilliang ka sorkar da mynjur ko yaka Resolution wow dawa pynkrehkaam ILP hapoh ka jylla, tangwa hadooh katni la 9 bnai leh wym em yoo yei syrngu ILP wei neini i daw wa pynman yaki u mih madan biang.
“La kammon kammon leh wym pdiang i yaka CAA haka jylla la jia katwa jia leh”, ong u Shiningstar.
Heiyatoh wa ka Entry Exit Point leh ong u wa katni han la ar le snem leh ka sorkar kheiñ stiñ bait ko, ka jylla sa katwon heh u khynjoh dap 50 snem ko, tangwa hawa khyruiñ cha u pood u ang leh sahteiñ. Da kylli u wa sa katwon snem ka jylla yong i u man ko kawa khlem pood, khlem aiñ neibhah hadooh katni man laitlan, wei ki bru yoh ki u psiah u mih katwa ngait.
