15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Baam smai kiwa kitkaam thymme ka JSU Central Body

Advertisement ad1

Jowai: Kiwa kitkaam thymme ka Jaiñtia Students’ Union Central Body ynne ka sngi da baam smai ki haka yalang wada pynman ha Bosco Pnar, Jowai hei emlang kiwa yahkhmat wa ki dkhot warim yong ka, wa kynthup ya u Nujorki Sungoh MLA ka Mowkaiaw, u Rikut Pareiñ, u L. War, u P. Lyngdoh wa kiwi nalor kiwa chah khut sñiawbha, wei ya kini ki dkhot thymme da pynbaam smai da u Rikut Parein President warim ka JSU.

U Jersome Shylla, President thymme ka JSU hawa klam u da pynsñiaw u yaka yurim yong ka seiñ, itæ toh wa hapoh ka JSU wym em wa mahajon næ wa dooh, ya kyrchaan wei ya burom kylliang hanla ki dkhot wan ki na ki jait ngait niam waphær waphær leh tangwa em ki iwi don i sñiaw nalor wym embynta ki haka Politics. 

Advertisement ad1

Chooh chooh khana u yaka JSU da sdang nadooh u snem 1972 wei dang boon ki luti wa ka seiñ u lai ko chakhmat. Yooluti u wa dei ya kyrchaan wei e buit e mynsien ki dkhot warim, i angnood ka seiñ u man kaam ki. 

Neiliang u Treiborlang Suchen, General Secretary da pynsñiaw u yei lai luti ka seiñ wei heijooh i por kyntu u ya kiwa mihkhmat ka Ri-loom Jaiñtia wow pait ki yei emkaam ka thaaiñ khamtam heiyatoh wow kyntu kynrong yei sap ki khon khynroo. 

U Nujorki Sungoh, MLA ka Mowkaiaw hawa klam kam u kongsan ong u wa yoh u chiboon i myntoi lyngba i embynta u hapoh ka JSU nachwa, nalor wa pynkynmoo u leh yei lai luti. 

Heijooh i por kyntu u wa hawa em i kitkhlieh wow man ki chipai ka ri, toh u tip yei kamram, ym toh wow pynemkaam bakla yei kamram. 

Hawa kyruiñ won u heiyatoh wa i eh haka thaaiñ khappood kawa haap hapoh ka Constituency yong oo wa kynthup nadooh u sarok, ki luti synkeiñ, i chait i khiah, i puræ puthi wa kiwi ki bynta, khana u wa da thooh u chiboon ki laad ki luti wei ngait skem u wym slem de u man kaam ki. 

Kiwi won ki bru waheh wa e yei klam nadooh u J.G.Kyndiah, Vice Chairman State Law Commission, ka Robila Mylliempdah, President JTA wa kiwi da e ki yei ktien pyn ehbok ehnasib ya kiwa kitkaam ka JSU wei kyntu ki leh wa hawa leh ya iwon iwon i kaam toh u pyrkhat bniah ym toh wow leh chongchit khang wa i naam i burom yong ka JSU u ku i.

Kiwa kitkam thymme ka JSU kynthup ki ya u President u Jersome Shylla, Vice President u Aplang Lamare, General Secretary u Treiborlang Suchen, Asst. General Secretary u Nilkie Mukhim, Finance Secretary u Tricky Mukhim, Chief Organising Secretary u Emperor Bareh, Sports and Games Secretary u Shemphang Shylla, Publicity Secretary u Dapmain Suchiang, Arts and Cultural Affair Secretary u Livingson D Sama, Education Secretary u Eddy K Pohtam, Disciplinary Secretary u Bawankynsai Sariang, Office Secretary u Successfull Sumer, Asst. Organising Secretary u Franky Shylla, Social Secretary u Nevercare Passah, Volumteer Secretary u Laskiborn Siangshai, Education Secretary u Dawan Bareh, Asst. Finance Secretary u Wansalan Patwet, Asst. Arts and Cultural Affairs Secretary u Sylvester Syrpoh, Environment Secretary u Tiphimi Rymbai.

Advertisement ad1
Share this:
Previous

U ya krehlang ka JHADC waka MPUF yow sylli ya ki kot ki sla ki baar jylla

Next

Dei chong kyllaiñ myngngor ha kylleiñ ki District ka jylla dawa ILP ki seiñbhalang