Ki artylli ki seiñbhalang kiwa kynthup ya ka Meghalaya People’s United Front (MPU) Laskein Block Circle wa ka Federation of Khasi Jaiñtia and Garo People (FKJGP) West Jaiñtia Hills District ynne ka sngi hapoh i yahkhmat u President yong ka u Phrang Suiam wa u President ka FKJGP u Nabait Ymbon da yachem ki wa u Manager yong ka Pasyih Tollgate u Surinder Singh Yadav hajrong i chah klam beiñ uwi u bru uwa duna hei doh i pran uwa naka chnong Shangpung ha ka 7 tarik uni u bnai.
Ha i yaklam wa u Manager yong katai ka Tollgate da kular u wow phah ya ki wakreh yong oo wow klam deiwa burom ya ki paradoh parasnam yong i wei ha i jooh i por da kular u leh wow pynchitom ya kitu ki wakreh yong oo kawa toh leh ka Supervisor ha ka Tollgate deiwa pyndam kreh chipor iwa 10 sngi ya kani ka bru neidaw wa ki arseiñ ym kwah ki wow pynchitom ya ka da iwa pyndooh kaam syndon ya ka tangwa kam i sneiñ ya ka wym toh u maham ya kiwon kiwon ki bru, ym toh wow yoobeiñ ya ka ri wa ka jaitbru yong i lada man kammon kammon leh wei lada dang jia kamni, ka seiñ dawa ko wow behkaam syndon.
