15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Chah pynsangeh ka Public Hearing ka Star Cement nei pynthut ki seiñbhalang, mynsoo 7 ngut ki pulit

Jowai: Ka Public Hearing næ i pynsñiaw paidbah yong ka Star Cement wa da pynman ynne ka sngi ha pchem ka yung krehkaam warim u DC ha Khliehriat da sangeh noh ko hadien wa ki seiñbhalang wa kynthup yaka KSU, JSU, EJNC, HANM, HYC, FKJGP, STIEH wa kiwi ki seiñ da toor ki khrui cha dara wa pynman yaka Public Hearing wei pynjæd pynpra ki leh yei kær i chna dep te psiah ki chapoh.

Ka Public hearing da sdang ko heipor kamwa 11 waje deiwa emlang nadooh u S. Syiem Asst. Environmental ER, Meghalaya State Population Control Board, u Deputy Commissioner East Jaiñtia Hills District, Khliehriat u E. Kharmalki, ki bru yong ka Star Cement, kiwa yahkhmat ki seiñbhalang, kiwa chong chnong ka Brichyrnot wa kiwi kiwi. 

I kulmar da sdang mih i chwa u sdang ka Public Hearing neibhah wa ki bor pulit wym em e laad ki ya waroh ki dkhot ki seiñbhalang u toor ki chei thaw wa pynman Public Hearing lait noh du kattu katni kiwa yahkhmat yong ki, wei heini mih i pakhot moo, heiwa katkam ka khubor, da em kamwa 7 ngut ki pulit kynthai wa chynrang kiwa mynsoo nei chah pakhot moo.

Hadien ini katwa dang yania hapyrdi ki pulit wa ki seiñbhalang, ka Public Hearing leh da sdang ko u lai chakhmat. Tangwa du hadien kattu katni por wa da sdang ka Public Hearing, ki seiñbhalang da wan toor ki dei bor chapoh ka dara wa pynman Public Hearing wei pynjæd pynpra yei yei kær i chna dep te psiah ki chapoh.

Manda ya psiah ki chapoh, neiliang u DC ka East Jaiñtia da kyrpaad u yaki wow man kiwa jai jai, wei da ong haroh u wa kani dang man i pynsñiaw paidbah donhi, wei hei sakhiat katkam ki kyndon toh u Register u e pyrtuid neibynta u yaklam iwi hadien iwi.

“Nga leh yieñ o heini wym wow kyrchan tangwa kam u sahep sorkar wow pyndep yei kamram neibynta wow pynkrehkaam ya ka  Environment Protection Act, katkam ka EIA, heiwa u DC man u leh u Chairman yong ka Public Hearing, wei katkam ka hukum yong ka High Court leh hei sakhiat ka Public Hearing toh neibynta ki bru wa chahktah, kamtæ ki bru wa chahktah da emlang ki heini wa ki wym em chahktah kamjooh. Neidaw wada em i thut sñiaw oo wow ong wa wym ye de u pteiñ yaka Public Hearing,” ong u DC ka East Jaiñtia Hills District u E. Kharmalki.

Ki seiñbhalang wa pyrchah ya kani ka Public Hearing ong ki i daw wa pyrchah ki toh wym em pynman cha ka thaw wa chah ktah, wei chwa kani ka sngi leh da pynsñiaw hi ki wa ym pdiang ki lym pynman chaka thaaiñ Brichyrnot.

Sa iwi leh ong ki wa lyngba i tih parmoo, daw pynsih ko yaki um ki wah waki dohum, nalor wow booh leh hei maa yaka Wildlife Sanctuary wei wym chah katai ka thaaiñ deilang wa kiwi.

Heijooh i por ong ki wa manda sdang ka karkhana wow tih ya u mar pohkhyndaw, daw pynkylla ko leh yei long i man i thaw hadooh wa em ki bru kiwa wan na baar.

Kyntu joor haroh ki yaka sorkar wa neini chakhmat wym toh de u pynman Public Hearing ko kat heithaw wa ngait ko, wei da pynbaad ki leh wa i khanglaad yaki dkhot yong ka seiñ wow embynta deiwa pynrkhiñ yaki bor pulit yoo kamwa ymtoh i kaam yong u paidbah iwa du neibynta i myntoi yong ki hi.

Hei yaklam won wa kiwa chong chnong ka Brichyrnot pynsñiaw ki yaka yurim wa  kyrchaan ki yaka Star Cement. 

Neiliang ka Angelina Massar ong ko, “Nga toh kawa chong dukan donhi tangwa sñiawthooh wei yoo neiwa wan ka Star Cement man i myntoi ya waroh ha kiwa boon ki liang, emkaam i kyrchaan neibhah ha pyrthai emkaam i wow ya imlang ya kyrchaan lang iwi yeiwi.”

“Heiyatoh wa i ong waka Company pynjæd ko yaka mariang, nga ngait skem O wa em ka aiñ ya waroh ki Company yow pynbha biang ya kitu ki thaw wa da dep tih. I kreh dei wym ktah yaka rymaw toh kawa emkaam neibhah ha iwon iwon i tih mar pohkhyndaw da em bait i ktah ya i khyndaw, ki khloo wei lada ym em ka tih ya ki marpohkhyndaw i ktah ya i khloo da em bait ko du neibynta iwa emkaam u bru, neibhah lada chna yung leh daw em hi i ktah,” da ong u Kiren Tariang.

Da pynrap haroh u wa lada ym leh iyi iyi, dei yi u baam, haka thaiñ yong i em ki mar pohkhyndaw, dei bor yong i ym ye i u leh iyi iyi tangwa dei wan ka Company wa biang ki tiar ki tar u tih yoh i yei myntoi. 

Hawa kyruiñ won u hajrong i ong wa chah ktah ki doh-um, ong u wa chwa u wan ki Company hapoh Elaka Narpuh leh da em hi i yap ki doh-um, iwa ye u man naki um Acid na u mooyong. Neiliang ka Company hachwa wow leh ko ya iwon iwon da em chwa ko ka Plan, wei kam kiwa chong chnong  kyrchaan i neidaw wa yoo i yei myntoi naka wei ka leh myntoi ko.

Yow pynksan chooh chooh ong u, ka Company wym em wan psiah yabor ko chaka thaaiñ yong i tangwa wan ko lyngba ka sorkar wei kamjooh dei e bor kiwa yahkhmat nachwa, i wan yong ka e khih e kreh ko ya kiwa chong chnong khamtam ha kini ki sngi wa saja u yoh kreh sorkar wot ki kreh wa khian wa nai.

“Hawa wan ka Company wan ko lyngba ka sorkar, wei ka sorkar datip ko yi u leh u e yarap ka Company  yaki bru ka thaaiñ. Ka sorkar yarap ko ya i lyngba ka Company wei ka Company yarap ko lyngba ka sorkar, tæ lada kini ar wym yatoh yumut ki mynnu mynnu leh ym yoh hi yei roi i paar ka chnong,” pynkut u Kiren Tariang.

Neiliang u Waheh chnong ka Brishyrnot u Standly Massar, pynsñiaw u ya i sñiawsih wa wot ha kani ka sien wa le wada pynman Public Hearing leh jia bait i kulmar, da kylli u wa ileh ka sorkar wym ye ko mo u e yei bichaar wa khooid khnang yow myntoi u paidbah, neibhah kamwa 100% ka chnong ku ko lada wyrchaw waki por nachwa wa kynthup nadoh ki sarok, ki umbam umdih wa kiwi.

“Dap i dei sñiawsih neibhah wym tip i hajrong iyi i thmu ki seiñbhalang pyrchah ki, hei sakhiat chwa wow leh kamni toh u yachem yumut ki wa kiwa chong chnong, wa halor kayi ka yurim pdiang i. Hei sakhiat man i chi doh chi snam tangwa i leh yong ki kamni khlem yoh de u yaklam man i iwa sñiawsih wa khroo. Hajrong ini kyrpaad i yaka sorkar wow pyrchang thooh ko ki laad ki luti khnang yow yoh yei suk,” klam  diaw u waheh chnong ka Brichyrnot.

Advertisement ad1
Share this:
Previous

Mynjur ka Pasyih Tollgate wow pynchitom ya ka wakreh

Next

117 ngut kiwa yoh, 78 kiwa chait wa sa 2 ngut wa khlaad na u COVID-19 ha Meghalaya