Shillong: U Lahkmen Rymbui uwa man leh u Montri ka chnat Kaampohyung ka jylla da ong u wa ym yoo u wa daw em iwon iwon i kulmar ha ki sngi wow wan na i khai im biang i dawa pynkrehkaam ya ka Inner Line Permit ha ka jylla, tangwa da pynsñiaw u yei tieñ wa ya u em ki bru chim kabu kiwa ye wow pynkulmar na kani ka phang.
Da ong wa neiliang ka chnat pulit daw paitbniah bha ko khnang wym mih iwon iwon i eh ha ka jylla kiwa ye u ktah ya i suk i saiñ.
Hawa yatoh wa i pynbna yakhih ki seiñbhalang, u Montri da ong u wa waroh ki bru em ki i hok wow pynsñiaw yei sñiaw yong ki, tangwa wow pynmankaam ya kawon kawon ka kaam, emkaam da i yaklam wei ki yakhih ym ye ki wow wanrah ya iwa kwah yong ka jylla.
Da ong u leh wa ka Inner Line Permit toh i kwah yong waroh kiwa chong chnong ka jylla, tangwa toh u sñiawthooh won wa ini i kaam chong ko du ha ka sorkar jylla, deiwa pynrap leh wa kam ki bru kiwa em ha ka sorkar, ki im sngi ki wa i dawa pynkreh yaka ILP u mankaam ko, wei neiliang u Montri Rangbah da chimkhia u wow yaklam ya i eh ka jylla cha ka sorkar pyrdi wei daw ye wow pynemkaam ya i ini i dawa ILP.
U Rymbui da ong u wa kam u Montri ha ka sorkar da thrang wei kwah u wa ka sorkar India u ap ko ya i sur ki paidbah wow pynkrehkaam noh ya ka ILP ha ka jylla.
Hawa kylli hajrong i pynslem ka sorkar India wow e ya ka ILP, u Rymbui da ong u wa ym ye wow tip iyi i daw yong i pynslem, tangwa kam kiwa yahkhmat ha ka jylla dang lai pynsñiaw ki cha ka sorkar India hajrong ini i kaam, wei toh leh i kamram kam ka sorkar jylla wow booddien khnang wa ka ILP u mankaam ko.
